Shuhet Kristaq Traja, Et’hem Ruka: Ishte një mendjendritur
“Në emër të ‘Luarasit’ faleminderit profesor Traja, figura si ju do t’i mungoni gjithmonë kujtdo që ka pasur fatin dhe ju ka njohur”
Ish-rektori i Universitetit “Luarasi”, Kristaq Traja, u nda nga jeta në moshën 66-vjeçare pas një sëmundjeje të rëndë.
Profesor Et’hem Ruka ka reaguar përmes një mesazhi ngushëllues mbi ndarjen nga jeta të konstitucionalistit Kristaq Traja. Ndërsa i shpreh ngushëllimet familjes, Ruka shkruan se profesor Kristaq Traja, njëherësh dhe ish-rektor për dy vite në Universitetin “Luarasi”, do të jetë gjithmonë mendje ndritur dhe vizionar. “Me hidhërim të thellë sot u njoftuam për ndarjen nga jeta të profesorit të së drejtës z. Kristaq Traja dhe njëherësh dhe ish-rektor për dy vite në Universitetin ‘Luarasi’. Profesor Traja kishte një karrierë të shkëlqyer dhe ka mbajtur pozicione të rëndësishme në sistemin gjyqësor jo vetëm brenda vendit por edhe jashtë vendit. Duke vlerësuar kontributin e tij në drejtimin e Universitetit ‘Luarasi’, shprehim ngushëllimet e sinqerta dhe të përzemërta për familjarët, miqtë dhe kolegët e tij. Për ne pasardhësit e tij në ‘Luaras’, profesor Traja do të kujtohet gjithmonë si mendje ndritur dhe vizionar. Jemi krenar që profesor Traja, ka qenë pjesë e ‘Luarasit’ dhe në emër tij i themi: Faleminderit profesor Traja, figura si ju do t’i mungoni gjithmonë kujtdo që ka pasur fatin dhe ju ka njohur”, shkruan rektori Ruka. Kristaq Taja u diplomua në drejtësi në Universitetin e Tiranës në vitin 1978. Ai gëzonte një eksperiencë 10-vjeçare si gjyqtar në Gjykatën Europiane të së Drejtave të Njeriut, Strasburg për periudhën 1998 – 2008 dhe është një ndër akademikët më të njohur në Ballkan për të Drejtën Kushtetuese. Karriera e tij si profesionist në fushën e ligjit ka filluar në vitin 1986 ku ka ushtruar detyrën e specialistit në Sektorin e Studimeve pranë Prokurorisë së Përgjithshme deri në vitin 1991. Ai ka qenë anëtar i Bordit të Kodifikimit në Ministrinë e Drejtësisë gjatë periudhës 1991 – 1992 dhe zëvendësministër i Drejtësisë gjatë viteve 1992 – 1993. Ai ka qenë gjithashtu, anëtar i grupit të punës për hartimin e Kushtetutës Shqiptare të vitit 1998. Prej vitit 1994, ai është pedagog i së Drejtës Kushtetuese në Fakultetin e Drejtësisë dhe Shkollën e Magjistraturës. Gjatë periudhës 2012 – 2014 ai ka qenë rektor i Universitetit “Luarasi”. Gjithashtu, që nga viti 2008, ai është avokat në disa studio ligjore prestigjioze në vend. Është autor i disa publikimeve dhe përkthimeve në fushën e ligjit.