Përkeqësohet situata, 17 viktima nga COVID-19 në 24 orë
“Vaksinimi, 500 mijë doza të tjera ‘Pfizer’ brenda vitit”
Vetëm në 24 orët e kaluara janë shënuar 17 humbje jete si pasojë e COVID-19. Fatalitetet janë rritur ndjeshëm përgjatë ditëve të fundit po ashtu, edhe numri i pacientëve në terapi intensive. Sipas Ministrisë së Shëndetësisë, ndër pacientët në gjendje të rëndë është edhe një grua 4-muajshe shtatzënë. “Aktualisht në Spitalet COVID po marrin trajtim 155 pacientë, nga të cilët 21 janë në gjendje më të rënduar. Me gjithë përpjekjet e mjekëve, në 24 orët e fundit nuk e kanë fituar betejën me COVID-19 shtatëmbëdhjetë qytetarë: 5 qytetarë nga Tirana të moshave 52-82 vjeç, 3 qytetarë nga Durrësi të moshave 71 79 vjeç, 2 qytetarë nga Kamza nga 81 vjeç, 2 qytetarë nga Vlora 63 dhe 82 vjeç, 1 qytetare nga Lushnja 51 vjeç, 1 qytetar nga Fushë-Kruja 64 vjeç, 1 qytetare nga Pogradeci 70 vjeç, 1 qytetar nga Kuçova 77 vjeç, 1 qytetare nga Mamurrasi 81 vjeç”, thuhet në njoftimin zyrtar. Lidhur me rastet e reja, nga 3,937 testim të kryera janë konfirmuar të prekur 680 persona, pjesa më e madhe në Tiranë, Fier, Sarandë dhe Durrës.
MANASTIRLIU Ndërkohë, është finalizuar marrëveshja e radhës me kompaninë “Pfizer”. Ministrja Manastirliu tha se brenda këtij viti do të mbërrijnë edhe 500 mijë doza të tjera të vaksinës. “Qeveria shqiptare vendosi sot (dje) kryerjen e menjëhershme të pagesës për mbi 500 mijë doza të vaksinës ‘Pfizer’, të cilat do të vijnë brenda këtij viti. Nëpërmjet këtij akti, bëhet e mundur menjëherë pagesa prej 6 milionë dollarësh, të cilët i hapin rrugë edhe ardhjes së menjëhershme të kësaj sasie të dozave të vaksinave, të cilat vijnë në Shqipëri për të plotësuar nevojat për të rritur mbulesën vaksinale. Qeveria shqiptare nuk po ndal përpjekjet e saj për të siguruar në vazhdim edhe doza të tjera të vaksinave. Falë edhe një kontakti të drejtpërdrejtë që Kryeministri Edi Rama ka pasur me drejtorin Ekzekutiv të ‘Pfizer’-it, është garantuar gjithashtu edhe sasia e vaksinave për vitin e ardhshëm, pra për 2022", tha Manastirliu.
VAKSINIMI E pyetur mbi ecurinë e vaksinimit dhe nëse po konsiderohet aplikimi i dozës përforcuese, ministrja tha se vendimi do të ndërmerret pas vlerësimit nga Komiteti Teknik i Ekspertëve. “Janë më shumë se 900 mijë qytetarë, të cilët kanë marrë dozën e parë të vaksinës, ose ndryshe rreth 44% e popullatës target. Ndërkohë që janë vaksinuar plotësisht 35.5 % e popullatës target. Sigurisht synimi ynë është që të rrisim mbulesën vaksinale.
Por, këtu kemi një lajm të mirë që popullata mbi 60 vjeç ka arritur një vaksinim mbi 64 %, që është një përqindje e mirë e mbulesës vaksinale. Sa i përket pyetjes në lidhje me dozat përforcuese, Komiteti i Ekspertëve të Vaksinimit është duke e vlerësuar programin, i cili mbështetet në programin tonë kombëtar të vaksinimit për dozat përforcuese. Sapo Komiteti i Ekspertëve do ta vlerësojë, patjetër që ne do ta marrim në konsideratë”, shtoi Manastirliu.