Çmimi i energjisë, Halimi: S’pati menaxhim të mirë
“Parlamenti, Ekzekutivi dhe Drejtësia të verifikojnë abuzimet me energjinë”
Ish-ministri i Drejtësisë, Eduard Halimi, ka reaguar pas paralajmërimit të Kryeministrit Edi Rama për rritje e çmimeve të energjisë elektrike dhe karburanteve. Në një postim në rrjetet sociale, Halimi thotë se me një menaxhim të mirë vjetor apo disavjeçar të kaskadës së Drinit nuk do të kishte këto mungesa të menjëhershme të energjisë në prodhimin vendas. Teksa ngre pesë pyetje, që sipas tij mund të çojnë në disa konkluzione, ish-ministri thotë se importimi ose blerja e energjisë nga jashtë është “Kutia e Pandorës” shqiptare. Blerja e energjisë sot për nesër sipas Halimit natyrisht që do të jetë me një çmim më të lartë, ndërsa e konsideron një mungesë të thellë profesionalizmi dhe menaxhimi pa vizion. “5 pyetje mbi Energjinë dhe ‘Pandorën shqiptare’! Si këshilltar ligjor i tregut privat të energjisë, unë dhe ekipi im jemi vazhdimisht të informuar mbi atë që ndodh me energjinë! Ne këshillojmë dhe përfaqësojmë më shumë se 60 kompani prodhuese të energjisë. Sipas ekspertëve tanë që mbulojnë prodhimin e energjisë nga HEC, prodhimi vendas në gjysmën e parë të vitit 2021 nuk ka qenë i ulët. Kjo do të thotë që me një menaxhim të mirë vjetor apo disavjeçar të kaskadës së Drinit, nuk do të kishte këto mungesa të menjëhershme të energjisë në prodhimin vendas. Menaxhimi i prodhimit të kaskadës së Drinit duhet parë në lidhje të ngushtë me gjithë prodhimin vendas. Kjo ishte skema fillestare kur u ofrua nga qeveria investimet në hec-et dhe fotovoltaiket e vegjël. Kjo skemë u prish dhe KESH nuk përfiton nga 532 MË hece dhe fotovoltaike për ta optimizuar ujin e rezervuarëve të kaskadës. Ndaj dhe këto 4 muajt e verës FTL (Furnizuesi i Tregut të Lirë FTL, pjesë e OSHEE) i duhet të blejë në treg të huaj energjinë (importojë) sot për nesër dhe kështu çmimi natyrisht do jetë shumë më i lartë. Kjo është mungesë e thellë profesionalizmi dhe menaxhimi pa vizion. Importimi, blerja e energjisë nga jashtë është ‘Kutia e Pandorës’ shqiptare. Ja pesë pyetje që ndoshta na nxjerrin në disa konkluzione? 1. A është e vërtetë se çmimi që u është blerë prodhuesve vendas gjatë 2021 është rreth 60 Euro/ Mwh? 2. A është blerë energjia nga (importi) disa ditë më parë nga FTL me 290 Euro/Mwh, ndërkohë që tregu dje në HUPEX (tregu hungarez që është tregu më i lirë në EU dhe prej nga ku zakonisht importohet energjia në Shqipëri, ishte gjysma e çmimit? 3. Po gjatë shtatorit a është blerë pothuaj me çmim mbi 100-180 Euro/ Mwh? 4. A janë në konflikt ERE/administrata qendrore/lokale me prodhuesit e vegjël të energjisë duke i vënë këta të fundit në vështirësi financiare në vend që t’i ndihmonin për të rritur investimet? 5. A ka lidhje ky represion ndaj prodhuesve vendas, me importin e energjisë nga 60 Eur/Mwh brenda në 290 euro/Mwh importi? Përgjigjet? Ndoshta kontrolli i duhur kushtetutës Parlament/ Ekzekutiv/Drejtësi do verifikonte nëse kanë lidhje, por të gjithë janë të zënë me gjëra më të mëdha se kjo. Ndoshta do t’i vijë radha”, shkruan ishministri Eduart Halimi.