Tërhiqet PS, deputetët do mblidhen fizikisht në salla për komisionet
Maxhoranca është tërhequr përfundimisht nga vendimi për mbajtjen e mbledhjeve të komisioneve parlamentare online, pas kundërshtive të shumta të opozitës. Dje, Konferenca e Kryetarëve ka vendosur që deputetët do të mblidhen fizikisht në ambientet e Kuvendit, duke respektuar masat anti-COVID. Pas debateve që përfshinë deputetët e opozitës dhe maxhorancën mbi mënyrën e zhvillimit të komisioneve parlamentare, të dyja palët ranë dje dakord për rikthimin e deputetëve në salla. Në vendimin e Konferencës së Kryetarëve, thuhet gjithashtu se komisionet mund të zhvillohen edhe online deri në përfundim të gjendjes së pandemisë me dakordësinë e Kryesisë së Komisionit Parlamentar. Konkretisht, për t’u lejuar të futen në komisione, anëtarët do të duhet të paraqesin certifikatën e vaksinimit ose testin PCR negativ i kryer jo më vonë se 48 orë përpara mbledhjes. “Zhvillimin e mbledhjeve te komisioneve të përhershme të Kuvendit, duke respektuar distancimin fizik të deputetëve dhe masat e tjera mbrojtëse për parandalimin e përhapjes së infeksionit të shkaktuar nga COVID19. Për të marrë pjesë në mbledhjet e komisioneve deputeti dorëzon pranë Sekretarisë së Komisionit certifikatën e vaksinimit ose testin PCR negativ të kryer jo më vonë se 48 orë përpara fillimit të mbledhjes. Me dakordësinë e Kryesisë se Komisionit Parlamentar mbledhjet mund të zhvillohen edhe në distancë nëpërmjet mjeteve të komunikimit elektronik, me terminal të pavarur deri në përfundimin e gjendjes së epidemisë së shkaktuar nga COVID-19”, thuhet në vendimin e Konferencës së Kryetarëve. Kryetari i Grupit Parlamentar të PS-së, Taulant Balla, u shpreh pas këtij vendimi se ai është në të njëjtën linjë edhe me organizimet e tjera në vend. “Unë kam propozuar që numri i anëtarëve të komisioneve të mos jetë kaq i madh. Sa më i vogël numri i anëtarëve të Komisionit, aq më shumë bëhet. Po ashtu, gjej rastin të falënderoj deputetët opozitarë që ramë dakord për mënyrën e zhvillimit të mbledhjeve të komisioneve duke e vendosur Kuvendin në një linjë me universitetet dhe shkollat dhe qasje të tjera që lidhen me luftën kundër pandemisë. Pjesëmarrja do jetë fizike”, tha Balla. Ndërkohë, kreu i Grupit Parlamentar të Partisë Demokratike, Alfred Rushaj, në një prononcim për media pas vendimit të Konferencës së Kryetarëve për zhvillimin e komisioneve hetimore fizikisht në sallë, u shpreh se ky vendim ka të bëj me një kthim në ligjshmërinë e këtyre komisioneve ashtu siç e parashikon rregullorja dhe Kushtetuta. “Vendimi që u mor sot në Konferencën e Kryetarëve kishte të bënte me kthimin e ligjshmërisë për komisionet parlamentare. Pas kërkesave tona dhe përpjekjeve tona për kthimin e ligjshmërisë së Komisioneve Parlamentare u ra dakord që mbledhjet të bëhen ashtu siç e parashikon rregullorja, fizikisht, por duke respektuar të gjitha masat anti-COVID”, tha Rushaj. Dje, Komisioni i Veprimtarisë Prodhuese ishte i pari komision që e zhvilloi diskutimin në sallë, por duke respektuar masat anti-covid19. Kujtojmë që mbledhjet e para të komisioneve nuk u zhvilluan normalisht për shkak të përplasjeve maxhorancë-opozitë, pasi anëtarët socialistë paraqiteshin online në mbledhje, ndërsa demokratët fizikisht. Pas vendimit për mbledhjen e komisioneve parlamentare me prani fizike të anëtarëve, Kuvendi ka lejuar edhe gazetarët që të ndjekin nga afër mbledhjet. Në një njoftim të Kuvendit thuhet se gazetarët dhe kameramanët duhet të paraqesin certifikatën e vaksinimit ose testin PCR negativ, përpara zhvillimit të mbledhjes.