Rama takon homologun spanjoll, Pedro Sánchez
Memorandum bashkëpunimi për arsimin e lartë dhe ekstradimet
Kryeministri Edi Rama u prit dje në një takim zyrtar në Madrid, nga Kryeministri i Mbretërisë së Spanjës, Pedro Sánchez, me të cilin nënshkroi edhe dy marrëveshje bashkëpunimi. Kjo është vizita e parë zyrtare e nivelit të lartë në Spanjë në historinë e marrëdhënieve dypalëshe. Kryeministri Rama dhe homologu spanjoll, Sánchez, nënshkruan memorandumin e mirëkuptimit ndërmjet Këshillit të Ministrave të Republikës së Shqipërisë dhe qeverisë së Mbretërisë së Spanjës, për bashkëpunimin në çështjet e arsimit të lartë. Po ashtu, dy kryeministrat nënshkruan edhe marrëveshjen shtesë të Konventës Evropiane për Ekstradimin, e vitit 1957. Kryeministri Rama vlerësoi se kjo vizitë hap një faqe të re në këto marrëdhënie me potencial të lartë bashkëpunimi politik, ekonomik e kulturor mes Spanjës dhe Shqipërisë. Po dje, Kryeministri Rama u prit në një takim nga Presidentja e Kongresit të Deputetëve të Spanjës, Meritxell Batet. “Vizita e parë zyrtare e nivelit të lartë në Spanjë në historinë e marrëdhënieve bilaterale hap një faqe të re në këto marrëdhënie me potencial të lartë bashkëpunimi politik, ekonomik e kulturor mes Spanjës dhe Shqipërisë”, shkruan Rama bashkëngjitur videos nga pritja zyrtare ne Spanjë. Rama shoqërohet në këtë vizitë nga ministri i Drejtësisë, Ulsi Manja, ministrja e Arsimit dhe e Sportit, Evis Kushi, ministrja e Bujqësisë dhe e Zhvillimit Rural, Frida Krifcam
dhe ministrja e Shtetit për Mbrojtjen e Sipërmarrjes, Edona Bilali. Bashkëpunimi me universitete prestigjioze jashtë vendit është artikuluar më parë edhe nga ministrja Kushi, e cila është shprehur se bashkëpunimet nuk do të jenë vetëm në kuadrin e programeve të studimeve të përbashkëta apo të dyfishta, por do të shtrihet në të gjitha aspektet e jetës universitare dhe akademike, me projekte të përbashkëta, me shkëmbime studentësh e pedagogësh, lidhjen me tregun e punës etj. Gjithashtu, Kryeministri Rama zhvilloi edhe një takim në Ministrinë e Universiteteve me ministrin Manuel Castells Oliván. “Në Ministrinë e Universiteteve me ministrin Manuel Castells Oliván, në vijim të nismës për sjelljen e universiteteve të huaja publike në Shqipëri”, theksoi Rama teksa publikoi edhe një video nga takimi. Kryeministri u takua edhe me sekretarët e Shtetit për Europën e për Tregtinë, Industrinë dhe Turizmin në presidencën e Dhomave të Tregtisë dhe Korporatës së Sipërmarrësve. “Takim me Sekretarët e Shtetit për Europën e për Tregtinë, Industrinë dhe Turizmin në presidencën e Dhomave të Tregtisë dhe Korporatës së Sipërmarrësve”, shkruan Rama. Pas Spanjës, Kryeministri Edi Rama niset direkt për në Slloveni, ku në 6 tetor organizohet samiti BE-Ballkani Perëndimor, për të ardhmen Europiane të Ballkanit, si dhe qëndrimi që do të mbahet në raport me Maqedoninë e Veriut.