Pakti Kosovë - Serbi, nis mbulimi i targave të makinave

Opozita dënon marrëveshjen, e quan nisje të zbatimit të “Zajdenicës”

Nga mëngjesi i së hënës, shenjat shtetërore të targave të makinave që hyjnë nga Serbia në Kosovë dhe anasjelltas, mbulohen me letër ngjitëse, duke nisu kështu fillimin e zbatimit të pikës së dytë të marrëveshjes së javës së kaluar të arritur midis palëve me ndërmjetësimin e BEsë dhe SHBA-së.

Marrëveshja kishte qëllim uljen e tensioneve në veriun e Kosovës. Sipas saj, letrat ngjitëse do të përdoren deri në gjetjen e një zgjidhjeje përfundimtare dhe një grup punues do të fillojë përpjekjet për të gjetur një zgjidhje të përhershme për këtë çështje më 21 tetor. Zbatimi i marrëveshjes ka filluar në të gjitha vendkalimet kufitare të Kosovës. Të shtunën e kaluar, forcat paqeruajtëse të KFOR-it u vendosën në vendkalimet kufitare me Serbinë, në Jarinjë dhe Bërnjak, duke i dhënë fund bllokimit të tyre për gati dy javë me radhë nga serbët lokalë, të cilët “nën kujdesin” e Listës Serbe (partia përfaqësuese e serbëve në Kuvendin e Kosovës) dhe Beogradit zyrtar, kanë mbajtur protesta që nga 20 shtatori, kur Kosova nisi zbatimin e masave të reciprocitetit me targat për Serbinë. Beogradi reagoi me zemërim ndaj vendimit të qeverisë së Kosovës, për të zbatuar reciprocitetin për përdorimin e targave të makinave, që nënkuptonte se makinat me targa serbe që hynin nga Serbia në Kosovë, duhet të marrin targa të përkohshme, njësoj siç veprohet në Serbi me makinat me targa të Kosovës, prej më shumë se dhjetë vitesh. Ajo dërgoni atje njësitë e posaçme për të siguruar zbatimin e vendimit. Protestuesit serbë vendosën barrikada në rrugë, ndërsa Beogradi ngriti shkallën e gatishmërisë ushtarake. Të enjten e kaluar, palët arritën në Bruksel një marrëveshje trepikëshe, të ndërmjetësuar nga Bashkimi Europian dhe të mbështetur nga Shtetet e Bashkuara. Pika e parë parashihte largimin e barrikadave dhe njësive të posaçme të policisë nga vendkalimet kufitare, gjë që ndodhi gjatë së shtunës. Marrëveshja e së enjtes u përshëndet nga diplomatët perëndimorë, ndërsa u kritikua ashpër nga partitë opozitare në Kosovë, të cilat thanë se me këtë, qeveria e Kosovës hoqi dorë nga sovraniteti në veriun e vendit. Të hënën që lamë pas, gjatë një debati në parlament, partitë opozitare thanë se me ketë marrëveshje, qeveria e Kryeministrit Albin Kurti po njeh legjitimitetin e institucioneve të Serbisë në territorin e Kosovës. Abelard Tahiri, nga Partia Demokratike, tha se vendimi i qeverisë për vendosjen e reciprocitetit me Serbinë për targat e makinave, u mor pa u këshilluar as me partitë opozitare e as me partnerët ndërkombëtarë, përfshirë Shtetet e Bashkuara. Ai e cilësoi të dëmshme përdorimin e targave të lëshuara nga autoritetet e Serbisë me akronimet e qyteteve të Kosovës. “Ky është hapi i parë që kemi filluar me implementimin e ‘Zajednicës’ (Asociacioni i komunave me shumicë serbe), me kompetenca ekzekutive, ky është dëmi më i madh që i keni bërë Republikës së Kosovës, për dy dekada nuk ka pasur marrëveshje më të dëmshme se sa kjo që sot e kemi”, tha Tahiri.