Blinken niset drejt Francës për të rikthyer Aleancën Transatlantike
Sekretari Amerikan i Shtetit, Antony Blinken, po udhëton drejt Francës, në vizitën e tij të parë në këtë vend pas arritjes së një marrëveshjeje të zgjeruar trepalëshe në fushën e sigurisë, mes Shteteve të Bashkuara, Australisë dhe Britanisë së Madhe (AUKUS). Kjo marrëveshje rriti tensionet mes aleatëve transatlantikë. Ekspertët presin që Blinken, i cili ka lidhje të forta personale me Francën, ta përdorë këtë vizitë për të përmirësuar marrëdhëniet mes Uashingtonit dhe Parisit. Diplomati më i lartë amerikan do të kryesojë takimin e ministrave të vendeve anëtare të Organizatës për Bashkëpunim dhe Zhvillim Ekonomik (OECD), planifikuar të mbahet në datat 5 dh 6 tetor, gjatë të cilit do të përkujtohet edhe përvjetori i 60-të i organizatës. Zoti Blinken do të zhvillojë dhe një takim dypalësh me ministrin e Jashtëm francez, Jean-Yves Le Drian. Franca do të marrë Presidencën e radhës së Bashkimit Europian nga 1 janari deri më 30 qershor të vitit 2022. “Sekretari Blinken gjithashtu do të takohet me homologun francez për të vazhduar bisedimet mbi forcimin e mëtejshëm të marrëdhënieve SHBAFrancë për një sërë çështjesh, përfshirë sigurinë në rajonin e IndoPaqësorit, krizën klimatike, rimëkëmbjen ekonomike pas goditjes nga pandemia e COVID-19, si dhe marrëdhëniet transatlantike. Diskutimet do të përqendrohen gjithashtu te bashkëpunimi me aleatët dhe partnerët tanë për të trajtuar sfidat globale”, thuhej në një deklaratë të lëshuar të premten nga Departamenti amerikan i Shtetit. Mes pakënaqësive të larta, pas një telefonate mes Presidentit Biden dhe Presidentit francez Emmanuel Macron më 22 shtator, e cila synonte të lehtësonte tensionet, udhëheqësit vendosën të nisin një proces konsultimesh të thella për të rikthyer “besimin”. Presidenti Macron vendosi gjithashtu të rikthejë në Uashington ambasadorin e vendit të tij, Philippe Etienne.