Në tri orë protestë të dhunshme, selia e PD kthehet në skenë krimi
Kreu i PD: Sot nuk është një ditë për t’u krenuar, por Sali Berishës i qeshi buza pasi u kthye në skenën e krimit
Për herë të parë në këto tri dekada u zhvillua një protestë nga aktorë të një partie kundër së njëjtës forcë. Ndodhi të shtunën pasi ish-kryeministri Sali Berisha thirri në protestë kundër Bashës mbështetësit e tij.
Protesta ishte lajmëruar nga Berisha dhe Komisioni i Rithemelimit në orën 12:00 para selisë së Pd-së, por protestuesit e parë erdhën që në orën 9:00. Fillimisht ata rrinin të heshtur para selisë, ndërkohë që PD zyrtare po bënte lëvizjen e saj në “shah”, duke mbushur oborrin e Pd-së me automjete kryesisht të vjetra në mënyrë që të kishte sa më pak hapësirë për demokratët. Për herë të parë të shtunën, vendi ku parkohet makina që përdor kreu i Pd-së u zu nga një golf jo shumë i ri. Ndërsa minutat kalonin në derën në krahun lindor futeshin deputetët dhe kryetarët e degëve që ishin thirrur në mbledhje në katin e dytë, ndërsa në oborrin e selisë mblidheshin protestuesit. Kur shkoi ora 10:30, oborri i Pd-së ishte mbushur plot, ndërsa kishin nisur edhe thirrjet kundër lidershipit. Ndërsa në mënyrë sporadike njerëz të ndryshëm e kryesisht të moshuar ngjisnin shkallët e para dhe afroheshin para derës kryesore të Pd-së. Kur kishte kaluar ora 11 dhe turma ishte bërë më e madhe, fillimisht një nga protestuesit pas dy tentativave prishi njërën nga kanatat hapëse të derës kryesore së Pd-së. Zhurma që shkaktoi thyerja e derës entuziazmoi turmën, e cila nisi vrullshëm të futej brenda në katin e parë të selisë së Pdsë dhe të thyente çdo gjë që dilte përpara. Ato që ruheshin fillimisht ishin vetëm kompjuterët dhe dokumentet. Por më pas, edhe për ta nuk kishte kujdes. Ndërkohë, rrugët që të çonin në katin e dytë ku ndodhen zyrat kryesore ishin të bllokuara me përforcues hekuri. Në këtë moment kishte ardhur edhe ishkryeministri Berisha dhe deputetët që e mbështesin. Për të realizuar qëllimin, protestuesve iu dha vare dhe pajisje të tjera të rënda për të prishur dyert prej hekuri. Përpjekjet nisën nga të trija anët e godinës së Pd-së për t’u futur brenda. Ndërkohë nga ana tjetër, pati edhe reagime nga personat që ndodheshin në katin e dytë duke lëshuar pluhur që përdoret për të fikur zjarrin. Ndërsa kur u shembën dyert e hekurit për disa minuta me radhë u hodhën mjete piroteknike derisa ndërhyri Policia. Kur ndërhyri Policia, kati i parë i Pdsë ishte shkatërruar, ndërsa edhe shumica e fasadave në katin e dytë ishin thyer.
REAGIMI
Një ditë pas protestës së dhunshme kryedemokrati Basha doli para gazetarëve ku tha se po bëhet bilanci. Ndërsa ditën e djeshme, nuk e cilësoi si një ditë për t’u krenuar. “Sot nuk është ditë për t’u krenuar apo për të qeshur siç bëri ai që ishte pak më përpara, nuk është ditë për të vallëzuar mbi rrënojat e dhunës të një agresioni që s’ka asgjë të përbashkët me demokratët, demokracinë dhe me vlerat e familjes sonë. Por, është një ditë për të përsëritur atë që kemi thënë prej kohësh, provat e të cilëve janë para syve të të gjithë demokratëve dhe të gjithë shqiptarëve. Qëllimi i vetëm i Sali Berishës në këtë përpjekje është qëllimi i deklaruar publikisht që në korrik se nëse Partia Demokratike nuk e merrte në mbrojtje, duke u kthyer në një bunker pasi u shpall ‘non grata’, atëherë Partia Demokratike nuk meritonte të ekzistonte”, tha Basha. Njësoj si organet e drejtësisë, Basha e quajti skenë krimi ambientet e Pdsë ndërsa akuzoi Berishën se shfaqej i gëzuar në skenën e krimit. Ndërkohë, hodhi poshtë akuzat se nga ana e Pd-së zyrtare është përdorur gaz lotsjellës. Apo lëndë të tjera kimike. “E para e punës, dua të refuzoj çdo akt dhune që është kryer dhe distancohem nga çdo akt dhune që është kryer nga një grusht banditësh të sjellë nga Sali Berisha këtu dhe jo nga demokratë se demokratët i solli për fasadë. Dhe ata kishin ardhur këtu me një qëllim, me qëllimin e shpallur nga Sali Berisha se në qoftë se kjo parti nuk kthehet për një bunker të shpallur ‘non grata’ nga Amerika duhet të shkatërrohet. Pra, të shkatërronin Partinë Demokratike, me çdo kusht me çdo çmim. Të derdhte gjak dhe të sillte shkatërrim. E patë sesi eksitohet, e patë si qeshte dhe sot?! A mund t’i qeshë buza një njeriu sot? Pikërisht këtu në skenën e krimit ku u kthye sot, u kthye në skenën e krimit dhe qeshte, e patë apo jo? Ndërsa pjesa tjetër është pjesë e manovrave dhe lojërave të Edi Ramës me Sali Berishën. Sigurisht, sekretari i Përgjithshëm i Partisë Demokratike nuk ka lidhje as me lëndë radio aktive dhe asgjë tjetër çfarë lexuat aty. Ndërsa ju vetë ishit kat më kat të Partisë Demokratike dhe patë që e vetmja gjë që ne kishim në dispozicion për t’u mbrojtur ishin bombola zjarrfikëse”, tha Basha.
Qëllimi i vetëm i Sali Berishës në këtë përpjekje është qëllimi i deklaruar publikisht që në korrik se nëse Partia Demokratike nuk e merrte në mbrojtje, duke u kthyer në një bunker pasi u shpall ‘non grata’, atëherë Partia Demokratike nuk meritonte të ekzistonte”, tha Basha.