Reagon DASH, Kim: Ata që nxisin dhunën, do mbahen përgjegjës
“SHBA është thellësisht e shqetësuar, thirrje organizatorëve të protestës të refuzojnë dhunën dhe të ushtrojnë qetësi”
Shtetet e Bashkuara të Amerikës janë ndjerë të shqetësuara për incidentet e dhunshme të ndodhura në protestën e thirrur nga Sali Berisha në selinë e Pd-së.
Përmes një reagimi në “Twitter”, ambasadorja amerikane, Yuri Kim, ka deklaruar se ata që nxisin dhunën ose minojnë sundimin e ligjit do të mbahen përgjegjës. Teksa bën thirrje për qetësi dhe protestuesit të refuzojnë aktet e dhunës, Kim thotë se SHBA është thellësisht e shqetësuar për përdorimin e forcës. “SHBA është thellësisht e shqetësuar me rritjen e tensioneve në ndërtesën e selisë së Partisë Demokratike dhe përdorimin e forcës nga protestuesit. U bëjmë thirrje organizatorëve të protestës që të refuzojnë dhunën dhe të ushtrojnë qetësi. Ata që nxisin dhunën ose minojnë sundimin e ligjit do të mbahen përgjegjës”, shkruan ambasadorja e SHBA-SË, Yuri Kim. Më herët, Ambasada amerikane në Tiranë kishte kërkuar shmangien e zonave ku do të organizohej protesta. Krahas Ambasadës së SHBA-SË, për dhunën e shkaktuar në selinë e Pd-së reagoi edhe Byroja e Çështjeve Konsullore në Departamentin Amerikan të Shtetit. “Protesta në selinë e Partisë Demokratike ka përshkallëzuar në dhunë, ku kanë ndodhur disa incidente, përplasje fizike apo edhe përdorim i gazit lotsjellës. Duhet të shmangni zonën përreth selisë dhe të qëndroni në gatishmëri për të evituar tubime të tjera që mund të regjistrohen në zona periferike”, thuhet në postimin e DASH. Ndërkohë, një qëndrim të qartë mbi dhunën dhe shqyerjen e dyerve të goditës së Partisë Demokratike reagoi edhe OSBE. “Prezenca e OSBE-SË po ndjek zhvillimet e sotme pranë selisë së Partisë Demokratike. Ne nxisim të gjithë aktorët e përfshirë të përmbahen nga çdo akt dhune dhe vlerësojmë Policinë për ruajtjen e rendit publik. Protestat paqësore janë në themel të demokracisë”, thuhet në reagimin e OSBE.
AMBASADAT
Të shumta qenë edhe ambasadat e huaja të cilat dënuan dhunën e ushtruar në selinë e Pd-së nga protestuesit, ndërsa kërkonin vetëpërmbajtje dhe qetësim të situatës. Ambasada britanike bëri thirrje për shmangie të akteve të dhunshme, duke theksuar se dialogu është rruga për zgjidhjen e mosmarrëveshjeve. “MB është e shqetësuar nga përdorimi i forcës nga protestuesit në selinë e Pd-së. U bëjmë thirrje të gjithëve të shmangin dhunën. Çdo mosmarrëveshje duhet të zgjidhet përmes dialogut, proceseve politike dhe ligjore, në interes të popullit shqiptar, jo interesave të ngushta individuale”, njoftoi Ambasada britanike. Një reagim të rëndësishëm bëri edhe Ambasada italiane, e cila shprehet se përdorimi i dhunës si një mjet politik është akt i papranueshëm. “Ambasada e Italisë dënon me forcë aktet e dhunës që u ushtruan gjatë protestës politike në Tiranë. Përdorimi i dhunës si një mjet politik është i papranueshëm dhe në shkelje të Kushtetutës dhe të legjislacionit shqiptar. U takon forcave të rendit të garantojnë ushtrimin në mënyrë të ligjshme të së drejtës për të protestuar, si dhe për të ndërhyrë me mjetet e duhura nëse dhe kur do të jetë e nevojshme. Ftojmë të gjitha palët të shmangin dhunën si dhe të zgjidhin paqësisht çdo mosmarrëveshje. Politika pikërisht për këtë shërben”, shkruan Ambasada italiane.
SHBA është thellësisht e shqetësuar me rritjen e tensioneve në ndërtesën e selisë së Partisë Demokratike dhe përdorimin e forcës nga protestuesit. U bëjmë thirrje organizatorëve të protestës që të refuzojnë dhunën dhe të ushtrojnë qetësi. Ata që nxisin dhunën ose minojnë sundimin e ligjit do të mbahen përgjegjës