Xhafaj: Nuk humbi veç Saliu e Luli, por gjithë shqiptarët
“Koha të ringrihet opozita, por me lidership krejt të ri dhe të painfektuar nga ‘berishizmi’ dhe nënproduktet e tij të ngjashme”
Ish-ministri i Brendshëm, Fatmir Xhafaj, përplasjen brenda Partisë Demokratike se kush do ta drejtojë atë e sheh si një degradim të kësaj partie, e cila si filozofi ka pasur “berishizmin”. Xhafaj e konsideron të turpshme dhunën e ushtruar ditën e djeshme, teksa shton se është fundi i degradimit të një partie politike. Xhafaj kërkon demokratizim të të gjitha partive politike në Shqipëri, që sipas tij, duhet të nxjerrin “NON GRATA” korrupsionin politik, autokracinë dhe arrogancën politike
FATMIR XHAFAJ
Nuk ka vend për fitimtarë e as për t’u gëzuar kur sheh se si demokracia dhunohet çmendurisht me vare e gurë, mbyllet me brava apo rivritet me demagogji populiste. Dje fatkeqësisht nuk humbën veç të falimentuarit historikë, Saliu e Luli, por të gjithë ne, shqiptarët, u goditëm nga dhuna e shfaqur ekraneve. Ata kanë kohë që janë rrokullisur dhe nuk meritojnë asnjë rresht. Problemi është se me ta dhe si ata po humbasim të gjithë çdo ditë e nga pak. Kështu humbet liria dhe fiton autokracia, humbet demokracia dhe fiton kleptokracia, humbet Shqipëria dhe fitojnë ata që përpiqen çdo ditë ta kontrollojnë atë duke mbajtur vetë bravën dhe vetë çelësin e demokracisë.
Fjala “TURP” është krejt e vogël për të emërtuar përdorimin e dhunës, për të marrë apo mbrojtur pushtetin brenda pushtetit partiak, për të pasur mundësi për pushtet publik, pushtet ekzekutiv apo pushtet personal mbi shqiptarët. Ky nuk është veç fundi i tmerrshëm i degradimit të një partie politike që na ka qeverisur dhe kërkon të na qeverisë përsëri, por një ngjarje prej së cilës duhen nxjerrë mësime, reflektime e veprime.
Kjo nuk është çështje godinash apo karrigesh, por çështje fryme, sjelljeje dhe kulture politike. “Berishizmi” ose autokracia e arroganca partiake, kleptokracia dhe korrupsioni politik, fatkeqësisht janë të prekshme në realitetet e sotme partiake. Shiheni modelin në të dyja pjesët e Pd-së: dy lidershipe, dy anë të së njëjtës medalje dhe pjesë të së njëjtës të keqe që kanë keqqeverisur prej vitesh këtë vend.
Kronika e paralajmëruar e një zinxhiri zhvillimesh negative në demokracinë partiake do të vazhdojë të thellohet më tej e më gjerë nëse nuk kapim thelbin e problemit: zbatimin e fortë dhe të barabartë të ligjit, forcimin e institucioneve ligjzbatuese përballë arbitraritetit të individëve të fortë, ndëshkimin e korrupsionit politik dhe demokratizimin e brendshëm të partive.
Qeverisjet janë produkt dhe pasqyrë e partive politike. Qeverisje të mirë, të ndershme dhe në interes të qytetarëve mund të garantojnë vetëm partitë politike ku demokracia e brendshme është aktive, ku debatohet e vendosin institucionet e kolegjialiteti në to, ku promovohen vlerat dhe individët e ndershëm, ku nxiten e bëhen konkurruese ambiciet e shëndetshme politike. Andaj, lipset emergjencë për t’i demokratizuar partitë, duke nxjerrë “NON GRATA” korrupsionin politik, autokracinë dhe arrogancën politike.
Koha të ringrihet opozita, por me lidership krejt të ri dhe të painfektuar nga “berishizmi” dhe nënproduktet e tij të ngjashme. Opozita na duhet realisht të gjithëve të jetë e fortë, e pavarur dhe e ndershme, për të shmangur dëmin e madh dhe me kosto të lartë ringjalljeje për demokracinë dhe institucionet demokratike. Kush mendon ndryshe, apo akoma më keq, punon për këtë gjë në prapaskenë, dëshiron autokracinë dhe kleptokracinë, vdekjen e demokracisë!