Atentat për herë të dytë ish-oficerit në Fushë-krujë
Gentjan Bejtaj u qëllua me breshëri kallashnikovi, makina aksidentohet dhe plagos 31-vjeçarin. Çfarë thanë në dëshminë paraprake
Atentati i dytë me armë zjarri i parapërgatitur ndaj një 41vjeçari në zonën e Fushë-krujës ka përfunduar me plagosjen e shënjestrës.
Gentjan Bejtja i ka shpëtuar kështu atentatit të organizuar nga persona ende të paidentifikuar, që kishin për qëllim eliminimin e tij. Makina me të cilën udhëtonte ai dhe miku i tij, Klodian Stafuka, është qëlluar me breshëri kallashnikovi afër një karburanti në fshatin Larushk në Fushëkrujë. Për pasojë, Bejtja mbeti i plagosur me armë zjarri.
AKSIDENTI
Pasi automjeti ku udhëtonte 41-vjeçari, i cili dyshohet të ketë qenë shënjestra e atentatit, u qëllua me breshëri plumbash, drejtuesi humbi kontrollin, duke përfunduar me makinën e tij jashtë rruge. Pas aksidentit, mbeti i plagosur edhe pasagjeri, 31-vjeçari, Klodian Stafuka. Mbiemri i tij lidhet me atë të Enver Stafukës, i zhdukur prej vitit 2016, ndërsa vetë Bejtja ishte mik i këtij të fundit. Dy të lënduarit janë transportuar me urgjencë drejt Spitalit të Traumës në Tiranë, ku ndodhen jashtë rrezikut për jetën. “Më datë 09.01.2022, rreth orës 18:00, në Spitalin Ushtarak, janë paraqitur për ndihmë mjekësore, shtetasit: G. B., rreth 41 vjeç, i cili në rrethana ende të paqarta dyshohet se është plagosur me armë zjarri në krah, gjatë kohës që po drejtonte automjetin dhe ndodhet jashtë rrezikut për jetën. K. S., rreth 31 vjeç, i cili është lënduar në aksident rrugor në Nikël, afër një karburanti, pasi mjeti që drejtonte shtetasi G. B., ku shtetasi K. S. ishte pasagjer, ka dalë nga rruga. Menjëherë shërbimet e Policisë dhe grupi hetimor kanë shkuar në vendngjarje dhe vijon puna për sqarimin e rrethanave të ngjarjes, identifikimin dhe kapjen e autorit”, njofton Policia.
DËSHMITË Policia e Krujës dhe ekspertë të Krimeve të Rënda nga Durrësi shkuan në vendin e ngjarjes dhe nisën hetimet për identifikimin e autorëve. Hetuesit shkuan edhe në Spitalin e Traumës ku ndodhen Gentjan Bejtja dhe Klodian Stafuak për të marrë dëshminë e tyre, por mësohet se këta të fundit kanë deklaruar se nuk e kanë idenë se kush qëlloi në drejtim të makinës së tyre. “Ishte e papritur. Nuk arritëm të dallonim asgjë. Vetëm kur plumbat u derdhën mbi makinë. Aty, për t’u shmangur, makina doli jashtë rruge. Nuk e kemi idenë se kush mund të na ketë qëlluar”, mësohet të kenë deklaruar ndër të tjera të lënduarit për Policinë. Kjo është hera e dytë që 41-vjeçarit Gentjan Bejtja i bëhet atentat.
Në vitin 2016 i ka shpëtuar një atentati me minë të telekomanduar. Bejtja ishte personi që së bashku me Enver Stafukën vodhën veturën e përdorur në vrasjen e kryekomisar Dritan Lamajt në vitin 2013. Po ashtu, Bejtja, një ishpolic i burgut të Fushëkrujës, është i njohur për Policinë për precedentë penalë në krimet ndaj pronës. Bejtja u bë i njohur me 26 shkurt të vitit 2013, një ditë pas vrasjes së kryekomisar Dritan Lamajt, në rrugën “Petro Korçari”, fare pranë banesës së tij. Ai së bashku me Enver Stafukën, u arrestuan nga Policia, të dyshuar për vjedhjen e veturës “BMW”, e përdorur në vrasjen e kryekomisar Lamajt.