Kryebashkiaku Veliaj mirëpret homologun prishtinas
“Çelim sot një faqe të re bashkëpunimi mes dy kryeqyteteve”
i sapozgjedhur i Komunës së Prishtinës, Përparim Rama, është mikpritur në Tiranë nga homologu i tij Erjon Veliaj. Në pritjen zyrtare të vizitës së tij të parë si kryebashkiak në Tiranë, Veliaj tha se sot çelet një faqe e re bashkëpunimi mes dy kryeqyteteve. “Është një kënaqësi e madhe të mirëpres në Bashkinë e Tiranës mikun tim, vëllanë tim, kryetarin e sapozgjedhur të Komunës së Prishtinës, me energji të reja dhe me një frymë jashtëzakonisht pozitive. Vërtet është ditë pushimi, po s’ka pushim kur je kryetar komune. Më vjen mirë që këtë ditë pushimi e kemi një vizitë zyrtare, të parën të Përparimit dhe skuadrës së tij fantastike në Tiranë, për të hapur një faqe të re të bashkëpunimit tonë, ku punojmë më fort, duhemi më shumë, lidhemi edhe bashkëpunojmë më intensivisht se kurrë më përpara”.
Sikundër vepron edhe me të tjerë mysafirë që shkelin në Bashkinë e Tiranës, Veliaj i dhuroi kryebashkiakut të Prishtinës “Çelësin e Tiranës”, në shenjë mirënjohjeje për vizitën dhe marrëdhënien e re që po nis. “Kemi një traditë në këtë qytet, për ata që i konsiderojmë miq specialë, njerëz të shtëpisë, dhe siç bën me çdo vëlla apo motër që e ke të familjes, gjithmonë ia jep një çelës për t’i treguar se dera është gjithmonë e hapur, je si në shtëpinë tënde. Në emër të qytetit të Tiranës, në emër të Këshillit Bashkiak, në emër të të gjithë qytetarëve që gëzojnë kaq shumë dashuri dhe respekt për Prishtinën, dua të ta dhuroj këtë çelës të qytetit të Tiranës, në shenjë të një dere të hapur, një dashurie të madhe dhe të një bashkëpunimi që na pret”.
Rama u ndie jo pak i vlerësuar nga simbolika e çelësit, teksa i drejtohet Veliajt me këto fjalë: “Vëlla, faleminderit shumë! Ndihem shumë i emocionuar me këtë gjest tuajin! Faleminderit shumë! E shoh këtë çelës jo vetëm si ‘Çelësin e Tiranës’, të qytetit, por një çelës i shumë dyerve që mund t’i hapim ne së bashku”. Dy homologët inspektuan edhe një prej investimeve më të rëndësishme të teknologjisë në kryeqytet, Piramidën e Tiranës, e cila do të kthehet së shpejti në qendrën më të madhe dixhitale në Ballkan.