Shufra hekuri dhe çekiç, si u sulmua selia e PD
Përshkrimi, “jeta e dhjetëra përfaqësuesve të partisë, kryetarit dhe dy grave shtatzëna ishte nën kërcënimin e të qenët objektiv i dhunës”
DHUNA E PAPRECEDENT DHE PASOJAT
Më pas z. Basha ftoi mediat (gazetarë dhe kameramanë) në një konferencë për shtyp, ku fillimisht bëri një xhiro në godinën e brendshme dhe të jashtme duke treguar dëshmi të dhunës brutale dhe shkatërrimit nga demonstruesit e dhunshëm. Duke folur në konferencën për shtyp, Basha dënoi atë që ai e quajti “organizata kriminale e Sali Berishës, që me mjete terroriste, tentoi të uzurponte me dhunë selinë e demokratëve, për t’u mbrojtur nga emërtimi ‘non grata’. Zoti Basha u shpreh se “të gjithë sot e kuptuan planin e tij nga kjo seli e vandalizuar. Çfarë ka ndodhur është më e qartë kur sheh se 500 apo 600 persona të thirrur nga Berisha ishin kriminelë dhe trafikantë të armatosur, duke zbatuar një plan të mirëmenduar dhe të ekzekutuar nga Sali Berisha”. Më tej, zoti Basha u shpreh se “në një ditë tragjike si kjo ka pa diskutim diçka historike. Me këtë filozofi të shkatërrimit, dhunës që nuk pranon disidencë, rregulla demokratike, kushtetutë të partisë, garë të vërtetë, por vazhdon trendi i vjetër: ju votoni, ju numëroni, ju bëni gjithçka. Dua të falënderoj nga thellësia e zemrës sime të gjithë të pranishmit këtu dhe qindra të tjerë që me përkushtim heroik ia dolën ta bëjnë të pamundur nënshtrimin e selisë blu nga organizata kriminale e Sali Berishës. Ata gjithashtu penguan objektivin tjetër të Berishës, që sot të ketë viktima, duke derdhur gjakun e demokratëve”.
Më pas, kryetari i Pd-së, z. Lulzim Basha, përshkroi përmes një videoje përmbledhëse dhunën e ndodhur të shtunën si “shfaqje të shëmtuar, ku Sali Berisha vulosi ditën e tij të fundit në politikë. Shumica absolute e demokratëve e braktisi atë dhe kriminelët me të cilët kërkonte të shkatërronte Partinë Demokratike. Demokratët sot qëndruan të vendosur dhe në mbrojtje të ‘Shtëpisë së Lirisë’, si e vetmja shpresë e shqiptarëve për ndryshim”. Pas mbylljes së konferencës për shtyp nga zoti Basha dhe kur përfaqësuesit e Pd-së nisën të largoheshin nga selia e partisë, oficerët e Policisë iniciuan sërish ndalimin dhe shoqërimin e tyre në komisariat. Ndër personat e ndaluar nga Policia nuk kanë qenë vetëm përfaqësues të Pd-së, deputetë, por edhe gazetarë të mediave. Reagimi i menjëhershëm ka ardhur nga sekretari i përgjithshëm i partisë, z. Bardhi, i cili e dënoi këtë lëvizje nga ana e Policisë dhe kërkoi shpjegime se pse ka një tentativë të dytë për të detyruar përfaqësuesit e Pd-së për t’u marrë në pyetje dhe shoqëruar në komisariatet e Policisë, pasi ata ishin marrë më parë në pyetje dhe u ishin kontrolluar Id-të dhe pajisje personale gjatë qëndrimit në seli.
MBULIMI I MEDIAVE NDËRKOMBËTARE
Sulmi brutal i Pd-së u mbulua gjerësisht nga audienca e mediave ndërkombëtare. Raportimi i tyre objektiv theksohej mbi përdorimin e dhunës dhe forcës nga demonstruesit si mbështetës të Berishës, pasi ai u përjashtuan nga partia e tij pas një përcaktimi si “non grata” për korrupsion të gjerë nga SHBA. “Reuters International” siguroi pamje ekskluzive fotografike dhe video nga skenat gjatë sulmit dhe gjithashtu ofroi analiza të gjera mbi ngjarjen. Gjithashtu “Breitbart” deklaroi se “mbështetësit e ish-liderit Berisha hynë në selinë e partisë, ndërsa Berisha bëri thirrje për një revolucion të pandalshëm”. Ndërsa “Jerusalem Posts” shkruan se “Policia shqiptare hodhi gaz lotsjellës, ndërsa protestuesit sulmuan zyrat e partisë. Protestuesit ishin mbështetës të ish-presidentit dhe Kryeministrit shqiptar Sali Berisha, i cili u përjashtua nga partia vitin e kaluar dhe iu ndalua hyrja në SHBA për shkak të supozimit për korrupsion”. Gjithashtu, “ABC News” ka pasqyruar ngjarjet e ditës së sotme në sulmin e Pd-së nga mbështetësit e Berishës. “Washington Post” shkruan në mënyrë eksplicite se partia kryesore opozitare është përballur me përplasje nga anëtarët, ndërsa ish-lideri Berisha vërshon me dhunë edhe selinë e partisë. “Guardian” shkruan se “Policia shpërndan protestuesit nga selia e partisë opozitare… Grupi i drejtuar nga ish-lideri i Partisë Demokratike, Sali Berisha, përdori shufra hekuri dhe çekiç për të hyrë në ndërtesë”. “Euronews” shkruan se “mbështetësit e Sali Berishës çajnë dyert e hyrjes kryesore të Partisë Demokratike”. Gjithashtu evidentoi dëmet e ndodhura gjatë sulmit nga demonstruesit e dhunshëm. Edhe “Zëri i Amerikës” në shqip ka pasqyruar ngjarjet përmes një reportazhi ku përshkroi se “mbështetësit e ish-kryeministri Sali Berisha sulmuan sot (8 janar) dhe dëmtuan rëndë selinë qendrore të Partisë Demokratike… Edhe dritaret e katit përdhes janë hapur me forcë, duke thyer xhamat…. Protesta u thirr kundër kryetarit të Partisë Demokratike, Lulzim Basha, në vijim të vendimeve që kishte marrë ndaj ish-kryetarit Sali Berisha, i shpallur ‘non grata’ nga SHBA për korrupsion dhe shkelje të demokracisë. Protesta u bë menjëherë e dhunshme, ndërsa Policia ndërhyri për të rikthyer sigurinë, pasi protestuesit kishin mundur të depërtonin brenda godinës. Nga ana e tij, zoti Berisha foli për ‘ndërhyrje kriminale’ të Policisë, duke deklaruar më pas se ajo që ka ndodhur ‘është vetëm faqja e parë e një lëvizje e pandalshme’”.