PD: Ilir Meta të qëndrojë larg selisë blu, ndërhyrja e tij, si e Ramës
Partia Demokratike u është përgjigjur deklaratave të Presidentit Ilir Meta duke i kërkuar që të qëndrojë larg zhvillimeve në selinë blu, pasi koha kur ajo përdorej si mbuloja e tij ka mbaruar. Përmes një deklarate për mediat, PD thotë se ndërhyrja e Presidentit është e njëjtë me të Kryeministrit Edi Rama dhe që tregon se treshen Berisha-rama-meta i bashkon halli i madh i tyre. “Ilir Meta dhe njerëzit e tij duhet të qëndrojnë larg selisë së Partisë Demokratike. Koha kur PD përdorej si mburojë nga Ilir Meta ka përfunduar në 9 shtator, kur PD u distancua nga Sali Berisha. Ndërhyrja e Presidentit të Republikës, njëlloj si Edi Rama, në një debat të brendshëm në Partinë Demokratike, tregon atë që kemi thënë që në nisje, që trekëndëshin Berisha-ramameta e bashkon një hall i madh, por që nuk është as halli i Partisë Demokratike dhe as halli i qytetarëve shqiptarë. Pastrimi i llumit të tranzicionit është mision për çdo demokrat, për çdo qytetar shqiptar dhe është e vetmja rrugë që Shqipëria të ecë përpara drejt së ardhmes europiane”, shkruan PD në deklaratën e saj. Kujtojmë që një ditë më parë, gjatë një interviste, Presidenti Ilir Meta deklaroi se: “Ajo që po ndodh në PD është një gjë krejt pa kuptim, dhe se për fat të keq, problemi kryesor ka qenë vetë çështja e lidershipit të opozitës, që gjithmonë ka marrë vendimet më të gabuara. Po ndodh që nuk asnjë kuptim që në demokraci të injorohet vota. Është gjëja më normale që kur një kryetar kontestohet, ai duhet t’i nënshtrohet një procesi votëbesimi. Duhet të tregojë apo të konfirmojë legjitimitetin e tij. Në demokraci autoriteti fitohet me votë. Konfirmohet me votë. Nuk fitohet me Polici. Fitohet me procedura. Çdo krizë politike ka vetëm zgjidhje politike. Zgjidhja është vota”, tha Presidenti Meta për “Rtv 21” në Maqedoni.