Rama: Sistem të ri të mbrojtjes kibernetike

“Shqipëria ka si objektiv krijimin e Qendrës Kombëtare të Mbrojtjes Kibernetike”

Kryeministri Edi Rama deklaroi dje se qeveria synon zvogëlimin e dëmeve ndaj të dhënave personale të qytetarëve nga persona të infiltruar apo paguar. Në fjalën e tij gjatë nënshkrimit të marrëveshjes për sigurinë kibernetike, Rama tha se kjo është një garanci për ata qytetarë që u shqetësuan pak ditë më parë me nxjerrjen në publik të të dhënave të tyre. “Ne patëm një ngjarje të rëndë, rrjedhjen e të dhënave personale të pagave, që na jep po ashtu edhe mësimin se nuk janë vetëm sulmet anonime kibernetike prej të cilave duhet të jemi të mbrojtur, por edhe sulmet nga brenda, prej personash të infiltruar, të paguar apo të papërgjegjshëm. E vlerësoj shumë aspektin e marrëveshjes sonë, që ka të bëjë edhe me garancinë se kapaciteti dëmprurës i individëve do të jetë shumë më i reduktuar. Një sistem i tërë i rritjes së cilësisë së burimeve njerëzore në gjithë rrjetin e njerëzve që merren me shërbime dixhitale dhe mbrojtje kibernetike do të vihet në funksion. Sistemi do të ketë shumë mure mbrojtëse edhe nga ndërhyrja e individëve. Ky është një lajm shumë i mirë edhe për ata që u lënduan padrejtësisht nga dalja e të dhënave personale”, tha Rama. Kryeministri deklaroi se Shqipëria ka si objektiv krijimin e Qendrës Kombëtare të

Mbrojtjes Kibernetike, e cila do të jetë në shërbim të ushtrisë shqiptare, por do të jetë njëkohësisht edhe një vlerë e shtuar për vetë NATO-N. “Sot jemi në një fazë të re të marrëdhënieve me SHBA-NË dhe NATO-N. Kemi disa investime të rëndësishme në infrastrukturën kritike dhe në aspektin strategjik, ku hyjnë edhe investimet në fushën e mbrojtjes, dhe në këtë aspekt, ne vlerësojmë shumë këtë mundësi bashkëpunimi, për të adresuar edhe sfidën e madhe të ngritjes së një qendre kombëtare të mbrojtjes kibernetike. Kjo është një sfidë e jashtëzakonshme, që do të jetë edhe një vlerë e shtuar për vetë NATO-N. Kjo qendër do të jetë në shërbim të ushtrisë sonë dhe gjithë aspekteve që kanë të bëjnë me pjesën civile të shoqërisë. Këtu nuk është thjesht çështja për të ndërtuar një sërë sistemesh sigurie, por për të ndërtuar një sistem tërësor sigurie, që nga ana tjetër të ketë mundësi të ofrojë një vlerë të shtuar edhe për NATO-N. Paradoksalisht, moszhvillimi i mjaftueshëm kthehet në avantazh dhe teknologjia në shans për të bërë kapërcime të jashtëzakonshme, siç ndodhi me transformimin tërësor në shërbimet online në Shqipëri. Marrëveshja e sotme do të sigurojë edhe një bazë të dhënash të garantuar të këtyre shërbimeve”, tha Rama.