Socialistët gati për zgjedhjet e pjesshme vendore, në pritje të dekretit

Partia Socialiste vijon përgatitjet e strukturave të saj për zgjedhje të pjesshme në 6 bashki, aty ku vendi i kryetarit mbetet ende vakant prej disa vitesh. Sekretari i përgjithshëm në Partinë Socialiste, Damian Gjiknuri, është duke punuar me strukturat e kësaj partie për këtë qëllim. Burime pranë Partisë Socialiste thanë dje për gazetën “Panorama” se pas vendimit të Gjykatës Kushtetuese për zgjedhjet e 30 qershorit, pritet që Presidenti Meta të dekretojë datën e zgjedhjeve të pjesshme për 6 bashkitë të cilat drejtohen ose me kryetarë të komanduar, por jo të zgjedhur, ose me ish-kryetarin, por pa mandat, siç është rasti i Shkodrës, ose me nënkryetarët. Vakancat kanë ardhur pas dorëheqjeve për shkak të ligjit të dekriminalizimit, apo proceseve penale ndaj kryetarëve të zgjedhur në vitin 2019. Shkodra ishte bashkia që do të krijonte precedentin e parë të drejtimit pa kryetar. Në zgjedhjet lokale të qershorit 2019, për shkak se prekej nga ligji i dekriminalizimit, Valdrin Pjetri dha dorëheqjen nga marrja e detyrës. Pas një deklarate të pamatur, pak ditë pas tërmetit tragjik të 26 nëntorit kryetarja e Bashkisë së Durrësit, Valbona Sako, dha dorëheqjen nga posti, për t’u zëvendësuar nga Emirjana Sako. Ligji i dekriminalizimit do të prekte kryetarin e Vorës, Agim Kajmaku. Ndarja nga jeta e kryetarit të Bashkisë Rrogozhinë, Haxhi Memolla, do të vendoste në krye të këtij institucioni nipin e këtij të fundit, Edision Memollën. Ndërsa në zgjedhjet parlamentare të 25 prillit, kryetari i Bashkisë Dibër, Dionis Imeraj, do të garonte për deputet, ndaj karrigen e tij në krye të Bashkisë e zuri Shkëlqim Murrja. I fundit që do të mbyllte sagën e bashkive pa kryetar ishte kryebashkiaku i Lushnjës, Fatos Tushe, i cili u shkarkua nga Kryeministri Rama, pasi u arrestua për korrupsion nga SPAK.