OBSH: Po rriten me shpejtësi rastet e reja

Ndërsa varianti “Omicron” përhapet me shpejtësi në Europë, Organizata Botërore e Shëndetësisë u kërkoi vendeve europiane që ta bëjnë të detyrueshme përdorimin e maskave në mjedise të mbyllura dhe t’i japin përparësi vaksinimit, edhe me dozë përforcuese, për kategoritë më të rrezikuara të shoqërisë, si punonjësit shëndetësorë dhe të moshuarit. Gjatë javës së parë të janarit në Europë janë identifikuar më shumë se 7 milionë raste të reja me variantin “Omicron”, shkruan “Zëri Amerikës”, çka përbën dyfishim të rasteve në vetëm dy javë. Drejtori i OBSH-SË për Europë, Hans Kluge, tha sot (dje) në një konferencë shtypi se 26 vendet europiane raportojnë se çdo javë mbi 1 për qind e popullsisë së tyre po infektohet me COVID. Kluge shtoi se situata aktuale po shuan shpresat e vendeve që të parandalojnë mbingarkesën në sistemet e tyre të shëndetësisë. Ai parashikon infektimin e gjysmës së popullsisë në Europën Perëndimore në gjashtë deri tetë javët e ardhshme. “’Omicron’ lëviz më shpejt dhe shtrihet më gjerë se çdo variant tjetër i koronavirusit. Prandaj u bëjmë thirrje vendeve që ta bëjnë të detyrueshme përdorimin e maskave të cilësisë së lartë në mjediset e mbyllura, të ofrojnë ato për kategoritë e rrezikuara dhe t’i japin përparësi vaksinimit të njerëzve edhe me dozën përforcuese. Punonjësit shëndetësorë dhe të tjerët që kryejnë punë thelbësore duhet të kenë qasje të hershme në dozën përforcuese, që shërbimi i tyre të mos ndalet”, thotë ai. Më herët zyra e OBSH-SË në Gjenevë u kishte kërkuar vendeve të pasura që të mos fillonin shpërndarjen e dozave përforcuese, por t’i dhuronin ato te vendet e varfra, ku nivelet e vaksinimit janë ende të ulëta. Ndërsa “Omicron”-i vazhdon të përhapet në lindje të kontinentit europian, Kluge u shpreh i shqetësuar se vendet me përqindje të ulët të vaksinimit do të përjetojnë shtim të madh të rasteve me variantin e ri. Në Danimarkë, theksoi ai, shtrimet në spital të të pavaksinuarve ishin gjashtë herë më të larta se të atyre që janë imunizuar.