Fiskalizimi, përjashtohen nga detyrimi edhe taksistët

Një tjetër kategori përjashtohet nga detyrimi për të lëshuar fatura të fiskalizuara. Bëhet fjalë për taksistët që përdorin taksimetër dhe shitësit e biletave të transportit. “Tatimpaguesit që ofrojnë shërbimin taksi të pajisur me taksimetër dhe ata që shesin bileta ose abone për transport pasagjerësh në sektorin e transportit publik urban brenda qytetit (autobusë) në përputhje me vendimin e njësive të vetëqeverisjes vendore, nëse fatura e taksimetrit, bileta ose aboneja u jepet pasagjerëve direkt nga drejtuesi i mjetit ose nga një person i autorizuar”, thuhet në udhëzimin e ri të Ministrisë së Financave, botuar në Fletoren Zyrtare që fut në listën e kategorive të përjashtuara nga fiskalizimi edhe këto shërbime. Bazuar në udhëzimin nr. 16, datë 3.4.2020, “Për Faturën dhe Sistemin e Monitorimit të Qarkullimit”, të përjashtuar nga detyrimi për të lëshuar faturën e fiskalizuar ishin prodhuesit bujqësorë, tatimpaguesit që shesin bileta ose abone për transport pasagjerësh në sektorin e transportit publik urban brenda qytetit si dhe shitësit ambulantë. Procesi i fiskalizimit po zhvillohet në tri faza. Fillimisht ka nisur të zbatohet prej 1 janarit të vitit 2021, nga bizneset e mëdha, të cilët lëshonin fatura për entet publike, e më vonë në 1 korrik të vitit të shkuar të gjitha faturat që lëshoheshin mes bizneseve duhet të ishin gjithashtu të fiskalizuara, dhe faza e tretë ishte në 1 shtator, ku faturat që lëshoheshin për qytetarët duhet të fiskalizoheshin, pra, në fazën e tretë reforma e fiskalizimit duhej të zbatohej nga të gjitha bizneset e vogla.