Bojkotoi zgjedhjen e Presidentit, Alibeaj: Rama na donte për fasadë
Kryetari i Grupit Parlamentar të Partisë Demokratike, Enkelejd Alibeaj, dhe deputetët që e mbështesin atë bojkotuan seancën e zgjedhjes së kreut të shtetit. Ndërkohë, në një postim në “Facebook”, Alibeaj akuzoi Kryeministrin se opozitën e donte për fasadë. Ndërkohë, sipas Alibeajt, fakti që kryetari i shtetit u propozua nga deputetë që sipas tij janë non grata tregon se Kryeministri nuk ka ndërmend që të luajë pastër. “Seanca për zgjedhjen e Presidentit të Republikës ishte farsa e radhës, për të cilën opozita i duhej Ramës vetëm për fasadë. Për shqiptarët e mësuar me lojërat e politikës së vjetër, shfaqja e sotme, që nga propozimi i emrit, procedurat e përshpejtuara dhe përfshirja e non gratave të Parlamentit,
dëshmuan dhe një herë se nuk ka asnjë të re nga fronti i atyre që mbajnë njëri-tjetrin në skenën e politikës. Grupi Parlamentar i Pd-së vendosi të mos marrë pjesë në këtë seancë fasadë votimi, sikundër në mënyrë tejet transparente, përgjatë disa takimeve mediatike në sytë të publikut u tregoi shqiptarëve që nuk bëhet pjesë e bojkotit të institucioneve apo negociatave, kulisave apo pazareve. Por kurrsesi nuk mund të shndërrohej në garniturë të pjatës së servirur nga Edi Rama”, shkroi Alibeaj teksa theksoi se sipas Kushtetutës Presidenti përfaqëson unitetin e popullit e duhet të gëzonte mbështetjen e të gjithë forcave politike. “Presidenti i Republikës forcën e vet e merr nga besimi dhe legjitimiteti që populli i jep. Ishte ky detyrimi që secila palë politike, e cila pretendon të përfaqësoje sinqerisht shqiptarët, duhej të angazhohej e të përmbushte kështu detyrimin e saj kushtetues, politik dhe institucional. Këtë besuam e besojmë dhe kësaj i shërbyem. E sotmja po, por edhe e ardhmja do na gjykojë e japë të drejtë”, vijoi Alibeaj.