Presidenti Meta nderon me tituj figura të larta shqiptaro-turke
Presidenti Meta ka nderuar me tituj të lartë disa figura të larta për kontributin e dhënë prej tyre në forcimin e marrëdhënieve turko-shqiptare. Gjatë vizitës zyrtare në Turqi, Presidenti Meta u prit nga dega e shoqatës “VATRA” në Stamboll dhe qindra bashkëkombës. Në ceremoninë e organizuar në kryeqytetin turk, Meta tha se diaspora e vjetër, ashtu edhe diaspora e re kanë dhënë një kontribut të pazëvendësueshëm në promovimin e traditës kombëtare, kulturës, historisë dhe vlerave tona më të larta. Në të njëjtën kohë, ata kanë kontribuar shumë edhe në forcimin e mëtejshëm të lidhjeve midis dy popujve tanë. Shqipëria dhe Turqia gëzojnë marrëdhënie të gjata e të ngushta miqësore. Këto marrëdhënie janë dhe do të qëndrojnë të tilla, sepse në themel të tyre është miqësia dhe lidhja e ngushtë ndërmjet popujve tanë, ku ju, diaspora shqiptare në Turqi, keni një rol të pazëvendësueshëm. Ne jemi krah njëritjetrit si aleatë në NATO, çka në
zhvillimet e sotme merr një dimension edhe më të rëndësishëm. Kemi marrëdhënie të qëndrueshme dhe pozitive, e cila pasqyrohet edhe sot në të gjithë sektorët e jetës, në mënyrë të veçantë, marrëdhënie të mira në ekonomi dhe investime. Shpreh
bindjen e plotë se Turqia dhe Shqipëria do vazhdojnë ta rrisin bashkëpunimin në të gjitha sektorët: në sektorin e turizmit, sipërmarrjes, bujqësisë, blegtorisë, ujit dhe peshkimit, e në fusha të tjera. Diaspora shqiptare në Turqi është një krenari
kombëtare dhe përçuese e vlerave tona më të larta. Presidenti Meta vlerësoi me dekoratën “Nënë Tereza” zonjën Mukades Koçeri, me titullin “Kalorës i Urdhrit të Flamurit” u dekorua z. Sokol Brahaj dhe Bora Zukali. Me titullin “Naim Frashëri”
Serdal Vardal, Trashëgim Hysejni, Halil Ozcan dhe Teuta Tabaku. Më herët, kreu i shtetit zhvilloi një takim edhe me kreun e opozitës në Turqi, kryetarin e Partisë Republikane, Kemal Kiliçdaroglu. Teksa e cilësoi si një takim të ngrohtë dhe miqësor, Meta u shpreh se: “Mik i sinqertë i Shqipërisë dhe popullit shqiptar, z. Kiliçdaroglu më konfirmoi vullnetin e Tij se forcimi i miqësisë dhe partneritetit strategjik midis Shqipërisë dhe Turqisë është interes i gjithanshëm dhe afatgjatë i dy popujve tanë dhe do të jetë prioritet i angazhimit të Tij. E ftova për një vizitë në Tiranë, të cilën e priti me shumë kënaqësi”.