Meta: Procedura për lirimin e Bajram Begajt u bë në Tiranë
Kreu i shtetit s’u bë pengesë pa shkak të ligjshëm për procedurat parlamentare Zëdhënësi i Presidentit: Nëse ndokush dëshiron, mund ta sfidojë dekretin në Gjykatën Kushtetuese, Administrative apo në çdo organ tjetër
Institucioni i Presidencës ka sqaruar se e gjithë procedura për lirimin nga detyra e Shefit të Shtabit të Përgjithshëm të FA, Bajram Begaj, përpara se ai të votohej në Kuvend si President i Republikës me 78 vota, është bërë në Tiranë në bazë të Kushtetutës.
Në një reagim për mediat, zëdhënësi i Presidentit Meta, Tedi Blushi, u është përgjigjur akuzave duke thënë Ilir Meta respektoi Kushtetutën dhe nuk u bë pengesë për ecurinë e procedurave parlamentare, pa shkak të ligjshëm. Duke shprehur keqardhje për ata që humbën rastin t’i mbanin iso këngës “Presidenti i vjetër bllokoi ardhjen e Presidentit të ri”, në reagim sqarohet se miratimi i një dekreti Presidencial si formë e shprehjes së vullnetit mund të bëhet kudo. Duke u përgjigjur akuzave se ky dekret është antikushtetues, pasi ai u firmos jashtë vendit, e konkretisht në Stamboll të Turqisë, ku Presidenti ndodhet për një vizitë zyrtare, Presidenca i fton të gjithë të njihen me aktin dhe nëse dikush dëshiron, mund ta sfidojë atë sipas dëshirës në Gjykatën Kushtetuese, Gjykatën Administrative apo në çdo organ tjetër. “Propozimi i Kryeministrit dhe kërkesa për dorëheqje e Shefit të Shtabit të Përgjithshëm nga detyra dhe lirimin nga shërbimi aktiv është administruar në Tiranë, është shqyrtuar nga stafi i Presidentit të Republikës në selinë e tij, po në Tiranë. Miratimi i një dekreti Presidencial si formë e shprehjes së vullnetit mund të bëhet kudo, por shqyrtimi i praktikës dhe hartimi i aktit, plotësimi i ekremiteteve, numërtimit, protokollimit, sekretimit, njehsimit, etj., janë veprime administrative që kryhen në Tiranë, në Presidencë. Kushtetuta, në nenin 93, parashikon vetëm se Presidenti i Republikës, në zbatim të
kompetencave të tij, nxjerr dekrete. Nëse ndokush dëshiron të njihet me dekretin edhe në format shkresor, mund të paraqesë një kërkesë për një kopje te njehsuar të këtij akti dhe mund ta sfidojë atë sipas dëshirës në Gjykatën Kushtetuese, Gjykatën Administrative apo në çdo organ ku ai e konsideron të aplikueshme dhe të realizueshme të drejtën e tij. Presidenti i Republikës ka përgjegjësinë kushtetuese të ushtrojë kompetencat e tij, në përputhje me Kushtetutën dhe në respekt të parimit të luajalitetit kushtetues ka ofruar dhe do të ofrojë gjithmonë mbështetje të sinqertë për ruajtjen e
kushtetushmërisë, si dhe duke mos u bërë pengesë pa ndonjë shkak të ligjshëm apo kushtetues për procedurat parlamentare. Presidenti Meta, jo vetëm në këtë rast, por asnjëherë nuk i është bërë pengesë autoriteteve/funksionarëve të lartë shtetërorë, që me vullnetin e tyre të lirë heqin dorë nga mbajtja e një detyre publike. Për më tepër që në rastin konkret bëhej fjalë për Presidentin e ri të Republikës. Na vjen keq për të gjithë ata që humbën rastin t’i mbanin iso këngës ‘Presidenti i vjetër bllokoi ardhjen e Presidentit të ri!’. Kushtetuta e para!”