Droni “kap” 45-vjeçarin duke u kujdesur për bimët narkotike

Kontrollet me dronë në terren, kanë zbuluar një parcelë me kanabis në zonën e Krujës. Policia tha se nga kontrollet në terren, droni filmoi një burrë duke u kujdesur për bimët narkotike. “Në vijim të kontrollit masiv të territorit, bazuar dhe në informacionet e marra në rrugë operative se në territorin e fshatit Rranze, kishte të kultivuara bimë narkotike, shërbimet e Policisë Krujë kanë organizuar operacionin policor të koduar “Bruz Zalli”, duke përdorur edhe dronë për kontrollin e territorit. Si rezultat i monitorimit me dron, në zonën e quajtur “Bruz Zall”, është evidentuar duke ujitur bimët e dyshuara narkotike, shtetasi S. H., i cili sapo ka parë dronin ka tentuar të fshihet, por është kapur në flagrancë nga shërbimet e Policisë. Gjatë kontrollit fizik, këtij shtetasi iu gjet një qese me lëndë narkotike në formë boçesh, që ia kishte dhënë shtetasi N. A., banues në fshatin Rranze, bashkëpunëtor në këtë veprimtari kriminale. Në përfundim të veprimeve procedurale u bë arrestuan në flagrancë shtetasit S. H., 45 vjeç dhe N. A., 39 vjeç, banues në Rranze, për veprat penale “Kultivimi i bimëve narkotike” dhe “Prodhimi dhe shitja e narkotikëve”, e kryer në bashkëpunim”, sqaroi Policia e Durrësit. Ndërkohë, më 22 prill, 400 rrënjë kanabis të mbjella në tokë publike në zonën e Thumanës u zbuluan nga policia. Në atë kohë, u kontrolluan 250 sera, 56 shtëpi të braktisura, tunele, territore të pyllëzuara, si dhe sipërfaqe publike dhe shtetërore. Ndërsa hapësirat e mbjella në terren janë zvogëluar, ka një rritje të kultivimit të bimëve narkotike në ambientet të mbyllura.