“UNUM” sjell në Shëngjin mijëra të rinj nga bota
Festivali ndërkombëtar i muzikës elektronike sjell në Lezhë 75 artistë me famë ndërkombëtare. Çfarë thonë turistët e shumtë
Shëngjini është bërë epiqendra e të rinjve nga e gjithë bota, këtë fillim qershori. Në këtë zonë turistike po mbahet festivali ndërkombëtar i muzikës elektronike “UNUM”. Art, muzikë, aktivitete sportive, promovim dhe kujdes për mjedisin.
Kjo është motoja e edicionit të tretë të këtij eventi, pjesë e të cilit janë bërë mijëra të rinj shqiptarë dhe të huaj. E shtuna dhe e diela, solli pikun e pjesëmarrjeve. Mbi 10 mijë të rinj shqiptar dhe vende të ndryshme të botës iu bashkuan këtij eventi, përgjatë këtyre dy ditëve, duke u bërë pjesë e atmosferës elektrizuese, ku 75 artistë me fame botërore luajnë muzike përgjatë 24 orëve në tri skenat e vendosura.
ÇFARË THONË PJESËMARRËSIT
Të ardhur nga vende të ndryshme të botës, pjesëmarrësit thonë se ky festival po i përmbush në maksimum pritshmeritë e ture, thonë se janë të surprizuar me bukuritë e Shëngjinit e Shqipërisë. “Kam lindur në Gjenevë. Unë jam nga Martinejt. Më pëlqen ky Festival. Çdo gjë është shumë e mirë këtu. Më pëlqen ky festival, ka këngë të mira”. “Vij nga Gjermania. Është hera ime e parë që vij këtu. Tradita është perfekte. E dua këtë vend pasi është një qytet vërtet i bukur”. “Vij nga Kosova. Muzika është e mirë, koha është shume e mirë, njerëzit janë të mirë. Në përgjithësi atmosfera është e mirë dhe po kënaqemi si vitin e kaluar”, thonë pjesëmarrësit.
TRAFIK I RËNDUAR NË LEZHË
Dyndja e qytetarëve për t’u bërë pjesë e festivalit ndërkombëtar të muzikës elektronike “UNUM”, solli trafik të rënduar mbrëmjen e së shtunës. Që prej orës 19:00 u krijua radhë kilometrike automjetesh nga zona e Knallës në Shëngjin drejt Ranës së Hedhur. Kjo situatë krijoi kaos në lëvizje, ndërkohë që efektivë të Policisë Rrugore dhe asaj të rendit janë vendosur në disa pika për të lehtësuar sadopak lëvizjen e automjeteve. E njëjta situatë ishte edhe pasditen e së dielës, kur edhe mbaroi festivali. Fluksi i lartë i automjeteve është shoqëruar me kaos në lëvizje në rrugën që lidh Shëngjinin me superstradën Lezhë-milot. Trafiku ka nisur që prej orës 17:00, duke u krijuar radhë kilometrike automjetesh. Edicioni i tretë e festivalit ndërkombëtar të muzikës elektronike do të mbyllë të hënën rrugëtimin 6-ditor në Shëngjin, ndërsa eventi i ka dhënë gjallëri këtij bregdeti, duke tërhequr vëmendjen e turistëve vendas dhe të huaj.