Ish-tëpërndjekurit,përfituesit nga fondi 8 milionë dollarë
Në shqyrtim dosjet e pas 2011-ës, dokumentet dhe afatet për dëmshpërblimin Emrat e trashëgimtarëve që duhet të plotësojnë dosjen për këstin e tretë. Deri më tani janë ndarë më pak se 1.5 milionë dollarë
Kanë mbetur më shumë se 8 milionë dollarë për dëmshpërblimin e ish-të përndjekurve nga regjimi komunist.
Në 4-mujorin e parë të këtij viti, sipas të dhënave të Ministrisë së Financave, janë ndarë 163 milionë lekë, ose rreth 1. 5 milionë dollarë, dhe pjesa e mbetur e fondit do të ndahet në muajt në vijim. Në shqyrtim janë marrë dosjet e pas 2011. Në radhë për pagesën janë më shumë se 19 mijë trashëgimtarë, të cilët për të marrë këstin e tretë të dëmshpërblimit, duhet fillimisht të plotësojnë dosjen. Familjet që kanë emrin në listë, kanë afat deri në muajin shtator për të dorëzuar dokumentet që kërkohen. Përveç kopjes së kartës së identitetit dhe numrit të llogarisë bankare që duhet të jetë hapur brenda 6 muajve të fundit, trashëgimtarët duhet të dorëzojnë
edhe certifikatë vdekjeje, certifikatë të trungut familjar, dëshmi trashëgimie, si edhe prokurë. “Kur një trashëgimtar i radhës së dytë nuk jeton, e drejta e tyre për dëmshpërblim në bazë të ligjit nr. 9831, datë 12.11.2007 ‘Për
dëmshpërblimin e ish-të dënuarve politikë të regjimit komunist’, i ndryshuar, nuk vazhdon më tej. Në këtë rast, shpërndarja e vlerës së këstit të radhës kryhet sipas rrethit të familjarëve për trashëgimtarët që jetojnë. Për
të fituar këtë të drejtë, rrethi i familjarëve duhet të dërgojë në Ministrinë e Financave dhe Ekonomisë: certifikatën e vdekjes së trashëgimtarit të radhës së dytë që nuk jeton”, saktësohet më tej në udhëzimin e Financave.
Dorëzimi i dokumenteve mund të bëhet dorazi ose nëpërmjet postës në adresë të Drejtorisë së Pagave dhe Dëmshpërblimeve. Për plotësimin e mangësive, familjarët e të dënuarve që nuk jetojnë, kanë 3 muaj afat.