Shqipëria pa helikopterë për të shuar zjarret, Rama: Janë të njëjtët shqipo, veç llafe
“S’fiket zjarri me degë peme”, komentuesit i përgjigjen kreut të qeverisë Kryeministri: Nga Turqia e deri në Spanjë, po hidhen përpjetë duke kërkuar helikopterë me kova uji biblik e me shkopinj magjikë
Kryeministrit Edi Rama nuk i bën përshtypje që Ministria e Mbrojtjes dërgon për remont helikopterët më shumë se një vit pas lidhjes së kontratës dhe vetëm një muaj para mbërritjes së temperaturave të larta, por e shikon problemin te kritikat e qytetarëve.
I gjetur përball akuzave të shumta të qytetarëve se përse Shqipëria nuk ka asnjë helikopter në dispozicion për të ndërhyrë nga ajri për shuarjen e flakëve në ishullin Sazan, kreu i qeverisë relativizon situatën me shtetet e tjera dhe akuzon shqiptarët se merren me fjalë. “Sa për ata që nuk kanë sy të shohin çfarë ndodh njëkohësisht, sot që flasim, rrotull Athinës apo çfarë ndodh kudo tjetër në kushtet e zjarreve, nga Turqia e deri në Spanjë, po hidhen përpjetë duke kërkuar helikopterë me kova uji biblik e me shkopinj magjikë, nuk kemi asgjë për të thënë! Janë të njëjtët shqipo, që në tërë historinë e këtij vendi, kanë bërë fiks të njëjtën gjë, llafe, llafe, llafe…”, shkroi Kryeministri Rama në “Facebook’. Por duket se argumenti i kreut të qeverisë nuk ka bindur ndjekësit e tij, të cilët i janë kundërpërgjigjur me komente. Një prej tyre i vendos në dukje Ramës se flakët nuk fiken me degë peme siç bëjnë forcat e armatosura shqiptare. “Jo mo zotëri, çfarë helikopterë kërkojnë këta...sa të jenë çunat e Forcave të Armatosura që ia fusni me degë peme me fik zjarrin. Emergjencat tona janë thjesht sa për tenderë. E keni lënë ministrin e Mbrojtjes në mëshirë të fatit si në kohën e Berishës kur ministri i Mbrojtjes nuk la me gjë pa shitur, edhe hekurat e rrethimit. Nuk fiket zjarri me degë peme e me frymën e shenjtë të çdo ushtari”, komentoi Stiljan Hoxha, një
prej ndjekësve të Kryeministrit Rama. Ndërkohë, një tjetër qytetar i cili komenton te faqja zyrtare e “Facebook”-ut të Kyeministrit Rama hedh dyshime
se shteti po lejon me qëllim flakët, pasi planifikon që t’i jepet privatit për të ndërtuar. “Diçka nuk shkon ose diçka do ndërtohet se s’ka
mundësi që shteti te mos arrijë të ndal zjarrin”, komentoi Lul Gjoka, një tjetër ndjekës i Kryeministrit në rrjete sociale.