Peleshi: Helikopterët, në remont pas operacioneve të tërmetit e përmbytjeve

Ministria e Mbrojtjes ka dërguar edhe 100 trupa të tjera të Forcave të Armatosura për të shuar zjarret në ishullin e Sazanit. Në njoftimin për media, Ministria e Mbrojtjes bën me dije se janë vendosur në dispozicion edhe tri anije të forcës detare. “Pas një pune të pandërprerë, efektivët e Fa-së kanë mundur të neutralizojnë rreth 14 vatra zjarri në ishullin e Sazanit. Rreth 100 trupa të tjerë të Forcave të Armatosura po dërgohen në terren, ndërsa janë vënë në dispozicion edhe 3 anije të Forcës Detare. Trupat vazhdojnë operacionin e izolimit të plotë të flakëve, krijimin e brezit të shpyllëzimit me mjete shtesë nga Komanda Mbështetëse”, njoftoi Ministria e Mbrojtjes. Ndërkohë që ende asnjë helikopter nuk është angazhuar për të shuar flakët. Për të justifikuar mungesën e tyre dhe dërgimin e helikopterëve për shërbime më shumë se një vit pas lidhje së kontratës Peleshi merr në analizë operacionet e 3 viteve të fundit. “Forcat e Armatosura disponojnë dhe kanë në gatishmëri mjetet e nevojshme fluturuese, të parashikuara për përdorim në përmbushje të detyrave e operacioneve që duhet të kryejnë edhe në raste emergjencash si zjarret. Fa-ja ka në gatishmëri helikopterë të lehtë, por që në specifikat e përdorimit të tyre kanë kufizime për të marrë pjesë dhe për të përmbushur detyra në raste të llojeve të ndryshme të operacioneve të emergjencave. Forca Ajrore ka helikopterë të kompletuar dhe të pajisur me mjete për operacione për mbështetje të emergjencave mjekësore si dhe edhe helikopterë ushtarakë të mesëm modernë të gjeneratës së katërt. Si rregull, ata i nënshtrohen kërkesave rigoroze të mirëmbajtjes dhe riparimit, bazuar mbi periudha përdorimi dhe kohë fluturimi. Në këtë proces, një pjesë e helikopterëve ushtarakë ‘Cougar’, të cilët prej një kohe të gjatë kanë qenë pjesëmarrës aktivë në operacione të shumta të emergjencave në kohë përmbytjesh, zjarresh, tërmeti, kushteve ekstreme të motit, në ndihmë të komunitetit, pjesëmarrjes në stërvitjet e ndryshme në Forcat e Armatosura, si dhe atyre me NATON të zhvilluara në vendin tonë, kanë kaluar në procesin e mirëmbajtjes dhe vënies në gatishmëri, në nivelin e tretë të mirëmbajtjes, proces që bëhet vetëm nga uzina jashtë vendit, të specifikuara për këtë nivel modern pajisjesh”, thekson Ministria e Mbrojtjes.