Ministrit rus Lavrov i ndalohet fluturimi nga tri shtete të NATO
Do zhvillonte vizitë zyrtare në Serbi. Maqedonia, Bullgaria e Mali i Zi e bllokojnë Ministri i Jashtëm rus: "Ballkani i Hapur" nismë serbe, Rusia e mbështet pavarësisht kundërshtimeve të Brukselit
Ka dështuar dje vizita e planifikuar e ministrit te Jashtëm rus, Sergei Lavrov, drejt Beogradit, ku pritej të takohej me Presidentin serb, Aleksandar Vuçiç, për arsye se Maqedonia e Veriut, Mali i Zi dhe Bullgaria nuk e lejuan avionin rus të kalonte në hapësirën e tyre ajrore.
Ky veprim ka lënë shije të hidhur te shefi i diplomacisë ruse, ku në një konferencë
online të transmetuar nga Moska, Lavrov e quajti “të paimagjinueshëm” vendimin e disa vendeve për t’i ndaluar atij të fluturojë mbi territorin e tyre dhe të vijë në Serbi. “Ndodhi diçka e paimagjinueshme. Shtetit sovran i është hequr e drejta për të ndjekur politikën e jashtme. Aktivitetet ndërkombëtare të Serbisë në drejtimin rus janë bllokuar”, tha Lavrov në një konferencë për media pas anulimit të vizitës së tij në Serbi. Lavrov tha se nuk është i befasuar nga cinizmi i Perëndimit dhe se e ka bërë të qartë se do të bëjë presion pa sakrifikuar as mjetet më të ulëta. Duke folur për Aleksandar Vuçiç dhe Serbinë, Lavrov u shpreh se Rusia do të vazhdojë t’i mbështesë. Ministri i Jashtëm rus ka shprehur mbështetjen për projektin e “Ballkanit të Hapur”, që ai e cilëson si një nismë të Aleksandar Vuçiç.
“Natyrisht, ata që po i tërheqin fijet në Bruksel, nuk e kanë dashur këtë, nuk kanë dashur që ne të shprehim mbështetjen tonë për Beogradin, ndër të tjera, projektin e Ballkanit të Hapur. Tashmë është e qartë për të gjithë se Brukseli, NATO dhe BE duan ta kthejnë Ballkanin në projektin e tyre të quajtur ‘Ballkani i Mbyllur’”, tha ministri i Jashtëm rus. Lavrov deklaroi se Brukseli nuk dëshiron të sigurojë një platformë për Rusinë në Beograd, që Moska të paraqesë qëndrimin e saj për një sërë çështjesh rajonale. Ai vlerësoi gjithashtu se sjellja e Europës e bën më të vështirë situatën ekonomike për qytetarët e saj. Lavrov ka shtuar se homologu i tij serb, Nikolla Sellakoviç, është ftuar në Moskë dhe shpreson që udhëtimi i tij nuk do të pengohet.
“Gjëja kryesore është se askush nuk do të mund të shkatërrojë lidhjet tona me Serbinë”. Mosrealizimi i vizitës se Lavrovit në Serbi ka sjellë edhe reagimin e ministrit të Brendshëm serb, Aleksandar Vullin, kur thotë se i vjen shumë keq për pengesën ndaj vizitës se Lavrovit, të cilin e ka përshkruar si “mik të mrekullueshëm dhe të dëshmuar të Serbisë”. Ministri serb konsiderohet si një ndër personazhet më pro Kremlinit. “Një botë në të cilën diplomatët nuk mund të arrijnë paqe, është botë në të cilën nuk ka paqe. Ata që parandaluan arritjen e Sergei Lavrovit, nuk duan paqe, ata ëndërrojnë të mposhtin Rusinë”, ka thënë Vullin përmes një deklarate. Më pak diplomatik, por i drejtpërdrejtë, ka qenë reagimi i Kryeministrit kroat, Andrej Plenkoviç, në lidhje me këtë “incident” kur deklaroi se Serbia duhet të jetë e kujdesshme se kë do të zgjedhë nëse ka ambicie për t’u anëtarësuar në Bashkimin Europian. “Nuk është koha për t’u ulur në dy karrige”, u tha Plenkoviç gazetarëve në Zagreb. Zëdhënësja e Ministrisë së Jashtme ruse, Maria Zakharova, e ka konsideruar vendimin “një tjetër kanal të mbyllur të komunikimit”. Kremlini ka thënë të hënën se mbyllja e hapësirës ajrore ka qenë “veprim armiqësor”. Zëdhënësi i Kremlinit, Dmitry Peskov, u ka thënë gazetarëve se një veprim i tillë mund të ndryshojë orarin e takimeve të nivelit të lartë diplomatik. Megjithatë, Peskov ka thënë se kjo gjë nuk do ta
pengojë Moskën nga mbajtja e kontakteve me shtetet mike. Ministria e Punëve të Jashtme në Shkup ka refuzuar kërkesën e Ambasadës së Federatës Ruse për shfrytëzimin e hapësirës ajrore të këtij shteti për fluturimin e avionit të ministrit të Jashtëm rus, i cili kishte paralajmëruar se do të vizitojë Beogradin
të hënën. Kërkesa e Ambasadës ruse është bërë pavarësisht se Maqedonia e Veriut më 28 shkurt ka vendosur sanksione ajrore ndaj Rusisë, pas pushtimit të Ukrainës më 24 shkurt. Qeveria e Maqedonisë së Veriut ka thënë më 6 qershor se mbron vendimin për refuzimin e kërkesës së Ambasadës
së Federatës Ruse për shfrytëzimin e hapësirës ajrore të këtij shteti për fluturimin e avionit të ministrit të Jashtëm rus, Sergei Lavrov. Kryeministri maqedonas, Dimitar Kovaçevski, ka thënë se Maqedonia e Veriut është shtet anëtar i NATO-SË dhe çdo vendim që merret nga Aleanca është edhe vendim i
Maqedonisë së Veriut. Nismës së Ballkanit të Hapur, në Ballkanin Perëndimor, nga gjashtë vende i janë bashkuar vetëm tri: Maqedonia e Veriut, Shqipëria dhe Serbia, ndërkohë që Mali i Zi, Bosnja dhe Kosova kanë shprehur hapur kundërshtitë e tyre ndaj kësaj nisme dhe nuk janë pjesë e saj.