Policia e Tiranës parandalon vrasjen e gruas nga burri
Parandalohet një krim i rëndë në një familje në periferi të Tiranës. Ka qenë ndërhyrja e shpejt pas një informacioni në rrugë jozyrtare që ka marrë Policia që ka shmangur një ngjarje të rëndë, ku një burrë pasi ka dhunuar bashkëshorten e tij ka tentuar t‘i marrë edhe jetën. Madje me varje. Policia ka ndërhyrë duke e vënë në pranga dhunuesin ndërkohë që ende nuk dihet se cili ka qenë motivi i atij akti makabër që burri tentoi të kryente ndaj nënës së fëmijëve të tij. Burime zyrtare të Policisë thanë se kanë vënë në pranga 57- vjeçarin me inicialet A. E., pasi mëngjesin e djeshëm ka ushtruar dhunë fizike ndaj bashkëshortes dhe më pas, me një litar të lidhur rreth qafës, ka tentuar ta vrasë. Burimet policore treguan se falë ndërhyrjes në kohë të Policisë parandalohet përshkallëzimi i mëtejshëm i konfliktit dhe vihet në pranga 57vjeçari. Shërbimet e Komisariatit
të Policisë Nr. 1, pas marrjes së njoftimit se në Shkozë, një shtetas po ushtronte dhunë ndaj bashkëshortes së tij dhe po tentonte ta vriste atë, menjëherë kanë organizuar punën dhe kanë kapur e shoqëruar në ambientet e Policisë, shtetasin A. E., 57 vjeç, banues në Shkozë. Ky shtetas, gjatë orëve të para të mëngjesit, ka ushtruar dhunë fizike ndaj bashkëshortes dhe më pas, me një litar të lidhur rreth qafës, ka tentuar ta vrasë.
Në vijim të veprimeve policore u arrestua në flagrancë shtetasi A. E., për veprën penale “Dhuna në familje”. Materialet procedurale i kaluan Prokurorisë pranë Gjykatës së Shkallës së Parë Tiranë, për veprime të mëtejshme. Ndërkohë janë marrë dëshmi nga njerëz ta familjes, të njohur të tyre dhe nga e dhunuara. Pritet që ditën e nesërme burri dhunues të dalë para gjykatës ku do të njihet edhe me masën e sigurisë që do të kërkohet ndaj tij.