Shqipëria bën dhurata, vetëm barazim në Islandë
Goli i Seferit nuk mjafton, na ndëshkojnë gafat në mbrojtje Kuqezinjtë nuk bindin me lojë dhe lënë dy pikë në Reikjavik
Shqipëria nuk shkon më shumë se 11 në Islandë, në ndeshjen e parë të këtij edicioni për Ligën e Kombeve. Barazimi mund të duket i pranueshëm kur përballë ke një kundërshtar që nuk i ke marrë asnjëherë pikë në transfertë. Mirëpo, 90-minutat e mbrëmshme në Reikjavik, treguan se jo vetëm humbëm një shans të madh për ta nisur me tri pikë, por mbi të gjitha bëmë dhurata për Islandën. U kthyem disa vite mbrapa sa i përket gabimeve individuale në mbrojtje, pikërisht në momentet më delikate të ndeshjeve. Këtë herë, reparti që luan i gjithi në Serinë A, me Gjimshtin, Kumbullën dhe Ismajlin, la për të dëshiruar në një takim ku garancia e tyre ishte shtysë e madhe për të çuar skuadrën drejt fitores. Gjithashtu ishim shumë të lexueshëm në manovrën sulmuese. Seferi shënoi në rastin e vetëm që iu dha, ndërsa nuk mjaftuan përpjekjet e Çekiçit dhe Cikalleshit, por as daljet e shpeshta në krahun e djathtë të Balliut. Rikthimi i Abrashit i shtoi grintën skuadrës në mesfushë, por këtë herë Reja e nisi me Asllanin dhe Bajramin nga stoli, në një kohë që zgjodhi që zëvendësimet t’i bëjë vetëm pas minutës së 73-të. Nuk ishte Islanda që të trembte apo të krijonte përshtypjen se me anën fizike, si pikën më të fortë, do të bënte diferencën, prandaj dhe dje Shqipëria dogji një shans të artë për ta nisur edicionin me fitore në fushën që s’ka asnjëherë mirë.
PJESA E PARË
Reja nuk heq dorë nga skema 3-5-2 dhe me Hysajn e Balliun nga krahët, kërkon t’u imponohet islandezëve. Udhëzimi është i qartë, teksa me Abrashin, Gjasulën dhe Çekiçin më afër tyre, kërkohet që të qarkullohet sa më shumë topi. Islanda e ka të vështirë të afrohet në zonën kuqezi, por edhe kur e bën, kjo ndodh për shkak të mungesës së sigurisë në prapavijën tonë. Balliu bëhet inspirues i aksioneve sulmuese, me zbritjen e shpejta në krahun e djathtë, teksa bashkë me Çekiçin kërkojnë të nxjerrin në pozita shënimi Seferin dhe Cikalleshin. Shqipëria dominon lojën dhe pas një aksioni me pasime të sakta deri në zonë,
ku marrin pjesë katër lojtarë, është Seferi që finalizon pas goditjes nga afër portës. Me 0-1 pas 30 minutash lojë, Kombëtarja fiton siguri, por nuk është e qartë në momentin që nis aksionet sulmuese. Sinjalin për një ditë “jo” të mbrojtjes e japin mosmarrëveshje e Kumbullës dhe Gjimshitit që në fundin e pjesës së parë, por këtë herë shpëtojnë dhe shkojmë në pushim me fitore.
PJESA E DYTË
Asnjë prej trajnerëve nuk kërkon të ndryshojë pas 15
minutave në dhomat e zhveshjes. Në një kohë që kërkohej administrim i lojës, Kombëtarja bën atë që nuk pritej. Kumbulla dhe Gjimshiti gabojnë sërish, por këtë herë nuk fal brenda zonës islandezi Thorstenison, i cili na ndëshkon dhe e çon ndeshjen 1-1. Një dhuratë nga kuqezinjtë për kundërshtarin dhe më pas çdo gjë bëhet malore. Reja pret reagimin, por tentativat e Gjasulës, Cikalleshit dhe Seferit nuk krijojnë rrezik në portën e Runarson. Italiani i pankinës kuqezi vendos
të hedhë në fushë menjëherë treshen Asllani-balajvrioni. Shqipëria shton presionin, por sërish është e paqartë për mënyrën se si e kërkon golin. Të vetmin moment të pastër e krijon Vrioni, por portieri i Islandës ia rrëmben topin në momentin final. Reja hedh në fushë edhe Veselin e Ramadanin, në një ndeshje që dukej e destinuar për barazim, pasi as minutat shtesë nuk sjellin ndryshime. Tashmë, Shqipëria ka shansin të marrë fitoren e parë të premten ndaj Izraelit në Tiranë.