Bardhi: Babai i Zenit duhet të kërkojë falje, e ka futur PD në rrugë pa krye
Deputeti i Partisë Demokratike, Gazment Bardhi, reagoi dje pas deklaratës së deputetit të CDU-SË se ata nuk do të bashkëpunojnë me Pd-në, nëse drejtohet nga një person i shpallur “non grata”. Përmes një postimi në “Twitter”, Bardhi i kërkon Berishës që të kërkojë falje se ka gënjyer demokratët, ndërkohë e akuzon se e ka futur Pd-në në një rrugë pa krye. Sipas Bardhit, ish-kryeministri, i saporikonfirmuar në krye të Pd-së, po e izolon Partinë Demokratike. “Babi i Zenit duhet të kërkojë ndjesë që gënjeu demokratët, që qëndrimi i Gunther Krichbaum, deputet i CDU/CSU në Bundestag, është personal. Raportuesi për Ballkanin Perëndimor në CDU, Peter Beyer, konfirmon se nuk do të ketë bashkëpunim me Sali Berishën, të shpallur ‘non grata’ nga SHBA për korrupsion madhor. Sali Berisha nuk mund të fshihet dhe të bëjë sikur nuk dëgjon dhe nuk kupton. Ai e ka futur Partinë Demokratike në një rrugë pa krye, duke e izoluar ndërkombëtarisht dhe duke çimentuar në këtë mënyrë regjimin e Edi Ramës”, shkroi Bardhi në “Facebook”. Kujtojmë që Gazment Bardhi ka qenë një nga deputetët që ka bërë akuza nga më të fortat ndaj ish-kryeministrit Berisha. Pak kohë më parë, ai u shpreh se Berisha ka bashkëpunuar me bandat në Elbasan për të marrë mbështetjen e demokratëve. Gazment Bardhi ishte drejtues politik në Elbasan në 25 prill dhe është akuzuar nga Berisha se loboi për mbylljen e komisionit hetimor të zgjedhjeve, pasi PS kërkoi hetimin e vrasjes gjatë fushatës.