Ibrahimajkonfirmonmonopolet, 80 për qind e produkteve bazë importohen nga 2-3 furnizues
“Nëse nuk shitet, produkti do të blihet nga rezervat e shtetit” Ministrja e Ekonomisë: 30 milionë euro si garanci për bankat që t’u japin kredi grosistëve për të blerë rezervën e detyruar 3-mujore
Ministrja e Ekonomisë, Delina Ibrahimaj, konfirmoi se në importin e produkteve ushqimore bazë janë krijuar monopolet, pasi 80 për qind e tyre sillen në vendin tonë nga 2-3 importues.
Gjatë diskutimeve në komisionet parlamentare, Ibrahimaj prezantoi mbështetjen e qeverisë me garanci sovrane prej 30 milionë eurosh për importuesit, me qëllim sigurimin prej tyre të rezervës së detyrueshme të produktit për 3 muaj. Përmes një akti normativ, qeveria u del garante 4 bankave në vend që ato t’u japin kredi importuesve, me qëllim që ata të zbatojnë një detyrim ligjor. E pyetur nga deputeti i Pd-së, Helidon Bushati se kush do jenë përfituesit dhe sa është numri i tyre, ministrja e Ekonomisë u shpreh se subjektet kryesore që importojnë produktet bazë si vaj, oriz, grurë e sheqer janë në numër të kufizuar, duke konfirmuar monopolet. Sipas Ibrahimajt, akti përcakton që në rast se rezerva nuk shitet, ajo do blihet nga rezervat e shtetit me të njëjtat kosto. “Garancia sovrane është kredi, bizneset do të paguajnë norma interesi, thjesht do të kenë kushte më të lehtësuara. Sa u takon numrave, subjektet kryesore që importojnë produktet vaj, oriz, grurë e sheqer janë të kufizuar në numër. Nuk bëhet fjalë për qindra. Ne i kemi listat. Janë 18 importues vaji, në oriz 7, në grurë janë 11 importues pra janë numra të kufizuar. Megjithatë, edhe brenda këtyre numrave, rreth 80 për qind e produktit importohet nga 2-3 furnizues. Nuk bëhet fjalë nga mijëra përfitues dhe një numër të pakontrolluar. Secili prej tyre ka detyrimin që të mbajnë rezerva për tre muaj, duke iu referuar sasisë së blerjeve të vitit të kaluar. Bordet nuk kanë për qëllim vetëm përcaktimin e çmimeve, por kanë për qëllim
edhe kuptueshmërinë e tregut, pasi është një treg që kontrollohet nga subjektet, jo nga shteti. Për të gjitha produktet, tregtarët thanë që kishin rezerva të mjaftueshme dhe kuptuam që ato duhet të mbaheshin. Në momentin që ne dalim nga kjo situatë dhe importuesit nuk arrijnë dot të shesin produktin e blerë për këtë afat 3-mujor ne kemi përcaktuar që ky produkt do të blihet nga rezervat e shtetit me kostot që ka pasur importuesi”, tha Ibrahimaj.
KRITIKAT
Deputeti Erion Braçe ka
ngritur disa herë shqetësimin e rritjes deri në 3 herë më shumë të çmimeve të imputeve bujqësore, që sipas tij vijnë nga monopolet në treg, pasi 95-98% të tregtisë së një produkti kontrollohen nga 23 kompani. “Kemi 3 probleme të mëdha në bujqësi. I pari, çmimet e rritura deri në 3 herë të imputeve bujqësore. Për problemin e parë, qeveria është dorëzuar, ka ngritur duart lart dhe po përsërit vetveten ‘s’kemi ça bëjmë, është tregu’. Tregu është i kapur dhe i përqendruar. 2-3 kompani që zotërojnë 95-98%
të tregtisë së një produkti nuk bëjnë treg. I kemi krijuar ne me vendime këto. Gruri del me humbje, misri me fitim që nuk arrin pagën minimale. blegtoria, lopët dalin me humbje”, i tha Braçe në sy ministres së Bujqësisë, Frida Krifca, në kuvend. Ish-zëvendëskryeministri ishte i bindur se: “Ne nuk ia dolëm dot të hiqnim barrierat e vendosura gjatë qeverisjes demokratike, e të krijonim mundësi për hyrje të reja në tregje dhe konkurrencë efektive. Duhet ndarë mendja ose me tregtarët, ose me fshatarët”.