SPAK hedh poshtë zërat për hetimin e kreut të ri të shtetit
Kallëzimet ndaj zyrtarëve të Mbrojtjes u bënë nga një ish-zyrtar Prokuroria e Posaçme: Bajram Begaj nuk ka asnjë çështje në hetim
“Kreu i ri i shtetit nuk është në hetim dhe nuk ka ndonjë hetim ndaj tij”! Kjo është përgjigjja që ka dalë ditën e djeshme zyrtarisht nga SPAK duke hedhur poshtë kështu zërat se ndaj gjeneral major Bajram Begajt ka një hetim në SPAK për shpërdorim detyre. Reagimi zyrtar i djeshëm ka shuar edhe zërat e shumtë që nxorën ditën e votimit të emrit të tij në Kuvend kallëzime që ishin kryer në SPAK për çështjen e disa pronave të ushtrisë. Megjithatë, shefi i Shtabit të Përgjithshëm mori votat e maxhorancës socialiste për t’u emëruar si figura më e lartë politike në vend. Kallëzimi
Bajram Begaj u zgjodh Presidenti i ri i vendit në raundin e katërt të votimit ditën e shtunë, me 4 qershor, ku mori 78 vota pro në Kuvend, 4 kundër dhe 1 abstenim. Mes zhurmës mbi zgjedhjen e tij si pasardhësi i Ilir Metës, pati edhe akuza se disa muaj më parë ai ishte kallëzuar penalisht nga ish-ushtaraku Artur Meçollari për tjetërsimin e bazave ushtarake. Duke iu referuar këtyre akuzave, opozita ka pohuar se President nuk mund të jetë një zyrtar që implikohet në të tilla çështje. Mirëpo SPAK e hodhi poshtë ditën e djeshme që ish-shef i Shtabit të Përgjithshëm të ishte nën hetim për ndonjë çështje. SPAK ka mohuar pretendimet
se Begaj është regjistruar si person në hetim në regjistrin e veprave penale.
Mirëpo, në një kthim-përgjigje të SPAK për shtetasin Artur Meçollari, që daton 23 majin e këtij viti, thuhet se janë regjistruar dy procedime penale në muajt gusht dhe shtator të vitit të kaluar për shpërdorim detyre. Në kthimin e përgjigjes, SPAK nuk evidenton emrin e personit ndaj të cilit janë regjistruar këto dy procedime, por në përgjigjen zyrtare për Meçollarin thuhet se “aktualisht këto procedime penale janë në fazën e hetimeve paraprake dhe aktet
e hetimit janë sekret hetimor”. Por në këtë dokument nuk dihet se kush është personi që ka kallëzuar Artur Meçollarri, ish-zyrtari i lartë, i cili u tha se kishte kallëzuar edhe ish-shefin e Shtabit të Përgjithshëm, Bajram Begajn.
Më herët u tha se përveç Begajt, Meçollari ka paditur për bazën e Shëngjinit edhe Ilir Xhebexhian, ish-komandant i Forcës Detare dhe Altin Kurtin, ish-komandant i Policisë Ushtarake. Ndërsa për bazën e Sarandës, e kallëzuar është ish-ministrja e Mbrojtjes, Olta Xhaçka, por ende nuk dihet se në çfarë faze janë hetimet