Operacione antidrogë në 2 qytete, 2 të arrestuar

Një sasi prej 230 fidanë të dyshuar kanabis sativa është sekuestruar nga policia në kuadër të operacionit të koduar “Blinisht”. Lënda narkotike u zbulua në Lezhë, ndërsa në pranga përfundoi pronari i bimëve narkotike. “Si rezultat i këtij operacioni është goditur një rast i tentativës për kultivim të bimëve narkotike. Për këtë rast është arrestuar në flagrancë shtetasi A. S., 34 vjeç, banues në Blinisht, Lezhë, për veprën penale “Kultivimi i bimëve narkotike”, pasi gjatë kontrollit të ushtruar në territorin në afërsi të banesës së tij, shërbimet e Policisë gjetën dhe sekuestruan 230 fidanë të dyshuar narkotikë kanabis sativa, të cilët ishin kultivuar në kubikë. Gjithashtu, gjatë këtij operacioni u arrestua në flagrancë shtetasi M. L., 24 vjeç, banues në Blinisht, për veprën penale “Prodhimi dhe shitja e narkotikëve”, pasi gjatë kontrollit të ushtruar në magazinën në afërsi të banesës së tij, shërbimet e Policisë gjetën dhe sekuestruan në cilësinë e provës materiale një sasi lënde të dyshuar narkotike kanabis sativa”, sqaroi Policia. Ndërkohë, një 31-vjeçar përfundoi në prangat e policisë në Durrës në kuadër të operacionit të koduar “Multifunksional”. Policia tha se brenda lokalit shpërndahej lëndë narkotike marijuanë, ndërsa prodhoheshin edhe kriptomonedha (Bitcoin), ndërsa një sasi kafeje ishte kontrabandë. “Shërbimet e Policisë, gjatë kontrollit të ushtruar në lokalin në pronësi të shtetasit A. K., në lagjen nr. 4 Durrës, gjetën dhe sekuestruan në cilësinë e provës materiale, rreth 260 gramë lëndë të dyshuar narkotike marijuanë, 18 pajisje që shërbejnë për gjenerimin e kundërligjshëm të kriptomonedhave, sasi kafeje të dyshuar të kontrabanduar, një sasi të vogël lëndë të dyshuar narkotike kokainë, 3 peshore elektronike dhe një shkop bejsbolli”, tha Policia. s.ll