Zelenskyy: Vendi ka humbur shumë njerëz, nuk dorëzojmë territor
Johnson: Jo presion mbi Ukrainën që të pranojë një marrëveshje për paqe “Ngërçi nuk është një opsion” për Ukrainën, thotë Presidenti, teksa përsëri hedh idenë e anëtarësimit në NATO
Presidenti ukrainas, Volodymyr Zelenskyy, tha të martën se Kievi nuk do të pranonte një situatë ngërçi në fushën e betejës me Rusinë dhe se synon të rimarrë kontrollin e të gjithë territorit të pushtuar nga Moska.
“Kemi humbur shumë njerëz që të pranojmë të dorëzojmë territorin tonë”, tha ai duke marrë pjesë përmes videos në një diskutim të organizuar nga gazeta “Financial Times”. Ai shtoi se një bllokim “nuk ishte alternativë” për Kievin. “Ne synojmë çlirimin e plotë të të gjithë territorit tonë”, tha Zelenskyy. Kievi ka thënë se forcat ruse kanë marrë kontrollin e rreth 20% të territorit ukrainas, përfshirë pjesë të saj në Lindje dhe Jug. “Ne nuk do të poshtërojmë askënd, ne do të përgjigjemi me të njëjtën monedhë”, tha Presidenti Zelenskyy, kur u pyet në lidhje me komentin e Presidentit francez, Emmanuel Macron, për të mos “poshtëruar” Rusinë, në mënyrë që të mbahet e hapur mundësia për një zgjidhje diplomatike. Zelenskyy tha gjithashtu se aleanca ushtarake e NATO-S duhet ta ftojë Ukrainën të anëtarësohet nëse dëshiron, duke shtuar se “nuk ka nevojë të humbim kohë në diskutimin mbi pranimin e saj”. Moska i ka përqendruar përpjekjet e saj në rajonet e Luhanskut dhe Donetskut, që së bashku përbëjnë Donbasin, pasi forcat e saj u mundën në periferi të Kievit në mars dhe u larguan nga Kharkivi, qyteti i dytë më i madh, muajin e kaluar. Ministri rus i Mbrojtjes, Sergei Shoigu, tha të martën se forcat ruse kanë “çliruar”, siç u shpreh ai, 97% të rajonit të Luhanskut. Megjithëse forcat e Kremlinit kanë fuqi më të madhe ushtarake, forcat ukrainase kanë rezistuar dhe kanë shfaqur aftësinë për të kundërsulmuar. Për ditë të tëra ka pasur raporte kontradiktore për atë që po ndodh në qytetin lindor të Donbasit, fokusi aktual i përpjekjeve të Rusisë për të pushtuar rajonin. Javën e kaluar, guvernatori i Luhanskut, Sergei Haidai, tha se rusët kishin marrë 80% të qytetit dhe se forcat ukrainase po bënin një tërheqje strategjike. Më pas, gjatë fundjavës, ai i tha BBC-SË se forcat e tij kishin kundërsulmuar, duke marrë përsëri gjysmën e qytetit. Njëkohësisht, burimet ruse folën për sukseset e tyre në rajon, duke publikuar video të luftëtarëve të tyre duke kërcyer në rrugët e qytetit. Pothuajse në të njëjtën kohë, Presidenti ukrainas, Volodymyr Zelenskyy, përshkroi situatën tepër të vështirë në rajon, të ditëve të vështira në vijim… ndërsa raportet erdhën për dy gjeneralë rusë të vrarë në vijën e frontit. Kryeministri britanik, Boris Johnson, tha në mbledhjen e qeverisë të martën se fuqitë botërore nuk duhet të bëjnë presion
ndaj Presidentit ukrainas Zelenskyy që të pranojë një marrëveshje paqeje të pafavorshme me Presidentin rus, Vladimir Putin. Sekretarja e Jashtme Liz Truss tha gjithashtu në mbledhjen e kabinetit se Londra po përgatit sanksione të mëtejshme kundër Rusisë për pushtimin e saj në Ukrainë. Qeveria e Ukrainës tha më parë se nuk do të binte dakord për një marrëveshje armëpushimi me Rusinë që përfshin heqjen e territorit. Ndërkohë, trupat e disa luftëtarëve ukrainas të vrarë në fabrikën e çelikut Azovstal i janë dorëzuar Kievit, thonë familjet e luftëtarëve të vrarë. Familjarët kanë shtuar se kjo ishte pjesë e një shkëmbimi të të burgosurve me Rusinë, ku secila palë mori 160 trupa. Nga ana e ukrainaseve, më shumë se 50 trupa ishin anëtarë të regjimentit Azov, njoftuan familjet. Procesi i identifikimit po vazhdon. Familjet shtuan se bisedimet janë duke vazhduar për shkëmbime të mëtejshme të të burgosurve, pa dhënë detaje të mëtejshme.