Përfitimet dhe zbatimi, firmosen marrëveshjet e “Open Balkan”
“Ballkani i Hapur”, Rama: Do të ngremë një grup të përbashkët për krizën dhe zgjidhjet konkrete
Në Samitin e Ohrit për “Ballkanin e Hapur” u nënshkruan dje disa marrëveshje mes vendeve pjesëmarrëse.
Kryeministri Edi Rama, Presidenti i Serbisë Aleksandër Vuçiç dhe Kryeministri maqedonas, Dimitar Kovaçevski nënshkruan marrëveshjen mbi bashkëpunimin në Ballkanin Perëndimor për njohjen e ndërsjellë të diplomave të lëshuara nga institucionet e arsimit të lartë. Ministrja e Kulturës, Elva Margariti, nënshkroi së bashku me homologët e Serbisë dhe Maqedonisë së Veriut memorandumin e mirëkuptimit për bashkëpunimin kulturor në Ballkanin Perëndimor. Ministrja e Turizmit dhe Mjedisit, Mirela Kumbaro, nënshkroi memorandumin e bashkëpunimit në turizëm me homologët e Serbisë dhe Maqedonisë së Veriut. Gjithashtu, tri vendet nënshkruan një memorandum për mirëkuptim dhe bashkëpunim mes autoriteteve të tatimeve. Kreu i Drejtorisë së Tatimeve, Ceno Klosi, nënshkroi marrëveshjen
së bashku me homologët e Serbisë dhe Maqedonisë së Veriut. Kryeministri Edi Rama njoftoi se vendet anëtare të kësaj nisme do të ngrenë një grup të përbashkët pune për krizën dhe zgjidhjet konkrete të saj. “Çdo gjë që ne
mund të bëjmë për të lehtësuar barrën e vendeve tona. Është diçka e vyer në këtë moment kur edhe kokrra e fundit e grurit do të ketë një peshë të madhe sa një thes me grurë, kur dhe kilovati i fundit i energjisë do të ketë një peshë sa një
megavat. Grupi jonë i përbashkët do të fillojë menjëherë nga puna. Në korrik do të zhvillohet një takim i ballafaqimit të grupeve të punës. Në shtator, në Beograd në panair ku do të jetë edicioni i parë i verërave, janë të ftuar të gjithë qytetarët e të gjithë rajonit “Ballkani i Hapur” është i gjithë qytetarëve, politikanët mund të zgjedhin të mos vijnë këtu. Pastaj samitin e ardhshëm për sigurinë energjetike që do ta bëjmë në Shqipëri. Rama njoftoi se Shqipëria së shpejti do të nënshkruajë marrëveshje me një tjetër “gjigand të furnizimit me energji”. “Së shpejti, kemi tjetër firmosje me tjetër gjigand të furnizimit energjetik. Një sesion në Maqedoninë e Veriut për konektivitetin, projektet e transportit. Një sektor për turizmin e mjedisin në Malin e Zi. Me gjithë kumtet e kukuvajkave që bujqësia do falimentonte, bujqësia sot është sektori që po rritet në aspektin e prodhimin e eksportit”, theksoi Rama.