“Open brothers”, Rama me Ahmetin dhe Abazoviç në Ohër
Shmang “Tour de France”, prezantohet projekti për urën Velipojë-ulqin Kryeministri: Brenda korrikut do vij në Mal të Zi
Edi Rama bëri dje bashkë “Open brothers”. Pas përfundimit të takimit të djeshëm në kuadër të nismës “Open Balkan”, Kryeministri Edi Rama postoi një foto në “Facebook”, ku duket me Kryeministrin e Malit të Zi Dritan Abazoviç dhe me liderin shqiptar të Bashkimit Demokratik për Integrim në Maqedoninë e Veriut. Rama i quajti “vëllezër”, për shkak të origjinës së përbashkët shqiptare që të tre këta politikanë kanë. Kryeministri Edi Rama dhe homologu malazez, shqiptari Dritan Abazoviç, prezantuan dje projektin e urës mbi lumin Bunë që do të lidhë zonën e Velipojës me Ulqinin. Abazoviç kërkoi që ura të projektohet me një lartësi të mjaftueshme për të lejuar kalimin e anijeve të turistëve dhe jahteve. Abazoviç deklaroi se ky projekt do të shmangë edhe trafikun pranë Shkodrës në pikën kufitare duke qenë se kamionët do të kalojnë nga kjo anë. Ndërsa Rama nga ana e tij nënvizoi se kjo është fryma e “Ballkanit të Hapur” që shmang gjithë “Tour de France” që detyroheshin të bënin qytetarët. “Ky është projekti dhe si u shpjegua në gusht do përfundojmë projektin e detajuar dhe pastaj do të ulemi së bashku menjëherë, FSHZH-JA me agjencinë tuaj kushdo qoftë ajo. Dhe do të vijojmë punën”, deklaroi Rama. Kurse Dritan Abazoviç konfirmoi se “Jemi shumë pranë fillimit të punës konkrete. Mali i Zi ka caktuar një pjesë të fondit kushtuar urës. Ndoshta nuk do të përdoret dot këtë vit megjithatë në momentin që përfundojnë projektin e detajuar mund të nënshkruajmë memorandumin. Kjo zonë që prej fillesës së bregdetit në Ulqin
mund të jetë një zonë tërheqëse turistike në të ardhmen. Megjithatë, kjo është mënyra si ne mund ta zgjidhim bllokimin e trafikut pranë Shkodrës, në pikën kufitare. Duke qenë se një pjesë e kamionëve do të kalojnë nga kjo anë. Është shumë e thjeshtë dhe shumë irracionale që dikush nuk e ka bërë më parë. Me këtë urë do të kemi shumë efekte pozitive në të dyja anët. Ura dëshmon që nuk jemi vetëm Ballkan i Hapur por jemi në një fazë të re të mënyrës si i kuptojmë marrëdhëniet dypalëshe. 100% keni mbështetjen time. Le të vijojmë menjëherë drejt projektit përfundimtar”.