Varfëria, të rinjtë po braktisin vendin
Rritja e çmimeve, asnjë masë nga qeveria për zbutjen e pasojave Shtohen listat e borxheve, qytetarët fajësojnë Kryeministrin
Rritja e çmimeve të mallrave të shportës ka sjellë si pasojë rritjen e varfërisë te shtresat më të dobëta të shoqërisë shqiptare. Papunësia, të ardhurat e ulëta, ndihma ekonomike qesharake dhe pensionet e pamjaftueshme, e kanë rritur ushtrinë e qytetarëve që janë në kulmin e varfërisë, kur e kanë gjetur veten para çmimeve 20-30 për qind më të larta brenda pak muajve. Njerëz që u drejtohen dyqaneve me xhepat bosh me shpresën se do t’u shënohet emri në listën e gjatë të borxheve, pasi para nuk kanë. Shitës që falin edhe një ditë tjetër ushqim për fëmijët, por që i afrohen falimentimit. Përjetimi është i njëjtë për banorët e Elbasanit e fshatrave si në Cërrik apo Peqin. Shitësit ambulantë apo tregtarë të tjerë kthehen shpeshherë duarbosh. Blerësit janë të paktë në Memaliaj dhe fshatrat përreth tij, ku kanë mbetur kryesisht pensionistë. Fatlum është ai që ka fëmijët në emigrim. Rritja me shpejtësi e çmimeve ka thelluar varfërinë në çdo skaj të vendit dhe shqiptarët i kanë sytë nga emigrimi. Sipas shifrave zyrtare, në vitin 2021 u regjistrua niveli më i lartë i të larguarve nga vendi në një dekadë, gati 33 mijë. Por numri në rritje i largimeve po plak vendin dhe po thellon edhe më shumë varfërinë. “Një djalë kam unë. Më iku ka 2 vjet në Gjermani, më la më plakën vetëm. Këtu edhe unë jam mërzitur, s’kam ç’të bej”, rrëfen një i moshuar. Banorët e fshatit Pojan në Korçë nuk po sigurojnë më asnjë të ardhur nga tokat. Shtrenjtimi i inputeve bujqësore, karburantit dhe mungesa e subvencioneve janë kosto më të larta se sa fitimet e siguruara nga punimi i tokave.