Ish-kryeadministratori i Kallmetit lihet prapa hekurave Gjykata e Lezhës refuzon kërkesën për një masë më të butë sigurie

Ish-kreu i Njësisë Administrative të Kallmetit në Lezhë, Besnik Simoni, i cili u arrestua me datë 2 prill pas një konflikti me armë me një bashkëfshatar të tij, do të vijojë të qëndrojë në burg. Gjykata e Lezhës rrëzoi kërkesën e 41-vjeçarit, i cili, përmes avokatit mbrojtës, kishte kërkuar një masë sigurime më të butë. Kërkesa për zëvendësimin e masës së sigurisë u shqyrtua nga gjyqtari Artan Hajredinaj, i cili pasi dëgjoi palët në proces, vendosi që ish-zyrtari lokal të qëndrojë në burg deri në përfundim të hetimeve. Përplasja me armë zjarri ndodhi mesditën e 1 prillit në rrugën që lidh fshatin Kallmet me superstradën Lezhë-shkodër. Fillimisht Policia raportoi se ishte plagosur në një atentat zyrtari i pushtetit vendor Besnik Simoni, por 4 orë me vonë blutë gjetën të plagosur në një banese në fshatin Kallmet të Lezhës edhe autorin, shtetasin Albekim tin Marku. Pas veprimeve paraprake hetimore, Policia doli në konkluzionin se të dy personat kanë qëlluar në drejtim të njëri-tjetrit dhe ata u vunë në pranga me akuzat “Vrasja me dashje, mbetur ne tentative” dhe “Prodhimi dhe mbajtja pa leje e armëve dhe municionit luftarak”. Në lidhje me ngjarjen, Prokuroria e Lezhës po vijon hetimet dhe nuk është arritur ende që të provohet nëse ka qëlluar edhe ish-zyrtari lokal Besnik Simoni, pasi është gjetur dhe sekuestruar vetëm një armë zjarri që rezulton të jetë përdorur nga 41-vjeçari Altin Marku, i cili vijon të qëndrojë me masën e sigurisë “Arrest në burg”. Konflikti mes ishzyrtarit lokal Besnik Simoni dhe 41-vjeçarit Altin Marku kishte nisur që prej 18 muajsh, për motive tërësisht banale, që nuk kanë lidhje me politikën dhe agravoi deri në përdorimin e armëve në fillim të muajit prill të këtij viti.