Topi: Me Presidentin ndamë eksperiencat dhe të përbashkëtat e institucionit

Bamir Topi është besimplotë se Presidenti i ri Bajram Begaj do të jetë një përfaqësues dinjitoz i kreut të shtetit. Në një prononcim për gazetën "Panorama", ish-presidenti Topi deklaroi se takimi ishte miqësor dhe se pa premisa për një presidencë dinjitoze në 5 vitet e ardhshme. "Ishte një ftesë e Presidentit të zgjedhur për një takim kortezie. Biseda ishte e përgjithshme duke ndarë eksperiencat specifike dhe të përbashkëtat e institucionit të Presidencës. U diskutua për situatën politike ndërkombëtare dhe rajonin dhe sfidat e institucionit në raport me perspektivën e vendit. Ishte një bisedë miqësore në respekt të ndërsjellë", tha Topi. Ish-presidenti theksoi se Begaj do të jetë një përfaqësues dinjitoz i kreut të shtetit. "Ishte takim kortezie, i bazuar mbi një vullnet të mirë për të takuar paraardhësit. Nuk ishte në sensin e marrjes së këshillave, por si një takim i parë në atë pozicion. Gjithmonë kur ka ftesa të tilla, qëllimi është pozitiv. E kam njohur z. Begaj në kushte të tjera. Ky ishe takim në pozicion tjetër dhe për qëllime të tjera. Zgjati rreth 90 minuta, ku pati opinione shumë njerëzore. Nuk mendoj se qëllimi i takimit ishte ky. Ishte takim i kërkuar nga vetë Presidenti. Gjatë bisedën lindin patjetër episode nga eksperienca, gjera që riciklohen për shkak të një marrëdhënie që ka institucioni i Presidencës me institucion të politikës. Diskutimet prej 90 minutash sjellin episode pikante. Pashë te z. Begaj një predispozicion për ta vazhduar atë komunikim. Gjithçka është në dorë të tij ai është Presidenti që do të marrë detyrën në 24 korrik", u shpreh z. Topi.