Fondi 15 milionë USD për dritat, si merret kompensimi
Janë 648 lekë në muaj, ose rreth 8 mijë lekë në vit, që pensionistët kryefamiljarë marrin në formë rimbursimi për dritat
Janë rreth 15 milionë që shkojnë çdo vit për skemën e rimbursimit të dritave për më shumë se 140 mijë pensionistë. Prej 2015-s, kur edhe hoqi fashën për konsum deri në 300 kilovat, qeveria vendosi të kompensojë diferencën e energjisë së harxhuar me 648 lekë në muaj.
Përveç pensionistëve, në skemë janë edhe 6 kategori të tjera sociale, përfshirë këtu familjet që trajtohen me ndihmë ekonomike, si edhe ato me të ardhura më pak se 35 mijë lekë në muaj.
KUSHTET Për të përfituar
nevojitet plotësimi i disa kushteve. Kjo do të thotë se jo gjithë ata që mbushin moshën e daljes në pension këtë vit janë përfitues. Kështu, për të marrë rimbursimin në vlerën e 648 lekëve, duhet që pensionisti të jetë kryefamiljar, të jetë i vetëm ose pjesëtarët e tjerë të familjes të jenë pensionistë (bashkëshorti/ja) ose të jenë të papunë punëkërkues. Pra, duhet që të mos ketë asnjë person në punë. Për këtë duhet të paraqesë certifikatën familjare ku janë të shënuar pjesëtarët e familjes. Në rastin kur janë dy pensionistë, pra, burrë e grua, kompensimin e përfiton vetëm njëri prej tyre. Kjo, pasi dokumenti tjetër që duhet është libreza e dritave në emër të aplikuesit për të marrë kompensimin. Por edhe nëse përfituesi plotëson kriteret, kompensimi nuk përfitohet nëse nuk ka konsum të energjisë elektrike dhe paguhet vetëm tarifa fikse e shërbimit. Aplikimet mund të bëhen pranë drejtorive rajonale të Institutit të Sigurimeve Shoqërore ose online përmes portalit “e-albania”. Bashkë me formularin e aplikimit duhet të dorëzohet fotokopje të kartës së identitetit, kopje e kontratës me Operatorin e Shpërndarjes së Energjisë në emrin e vet, kopje e librezës ose faturës së likuiduar që vërteton që e paguajnë energjinë e konsumuar, si edhe certifikatë familjare për të vërtetuar që janë kryefamiljarë të vetëm ose kanë persona të tjerë të familjes në moshë pune. Në rast të aplikimit online dokumentet duhet që të dorëzohen në adresë të zyrës vendore të sigurimeve përmes shërbimit postar.
RIMBURSIMI
Janë 648 lekë, ose rreth 8 mijë lekë në vit që pensionistët kryefamiljarë marrin çdo muaj në formë rimbursimi për dritat pas heqjes së fashës. Por, vlera e kompensimit është gati dyfish më e lartë për ata që iu është caktuar pensioni para 2015-s, pasi ndër vite janë miratuar disa vendime për kompensimin e energjisë elektrike, duke e çuar në rreth 1600 lekë vlerën e rimbursimit. Këtë vit edhe për
shkak të krizës energjetike pritet rishikimi i skemës. Edhe pse nuk jepen detaje mbi mënyrën sesi do të rimbursohen familjet në nevojë dhe pensionistët, ajo çka mund të thuhet më siguri është që mbi skemën aktuale do të vihet dorë. Një gjë e tillë vihej në dukje edhe në relacionin e projektbuxhetit për vitin 2022, ku vihet në dukje se ka nisur puna për vlerësimin e skemës si një masë kjo për të minimizuar barrën në buxhet. “Me qëllim zvogëlimin e humbjeve financiare, ‘OSHEE Group’ sh.a., është
duke programuar masa të shpejta lidhur me daljen nga kjo vështirësi në mënyrë që të arrijë një performancë pozitive financiare të sektorit për përballimin e situatave eventuale të vështira në të ardhmen pa rënduar buxhetin e shtetit. Propozimi për rishikim të skemës së mbështetjes sociale për rimbursimin e energjisë: Ministria e Financave dhe Ekonomisë ka dhënë miratimin paraprak për këtë çështje dhe asistenca teknike për vlerësimin e skemës aktuale ka filluar punën”, thuhet në dokument.