Kishte ngritur laborator “Bitcoin”, arrestohet 21-vjeçari Në pranga edhe bashkëpunëtori në Shkodër, u gjetën 16 pajisje
Disa ditë pas zbulimit të një magazine në Shkodër ku ishin vendosur pajisje për prodhimin e “Bitcoin”-ëve, Policia ka arrestuar një 21vjeçar, i cili ushtronte aktivitetin e paligjshëm. Në pranga është vendosur shtetasi Jetmir Mehja, ndaj të cilit Gjykata kishte vendosur masën e sigurisë arrest me burg. Në kuadër të operacionit të koduar “Avalon”, Policia arrestoi dhe një 43-vjeçar me iniciale E.M. për bashkëpunim me 21-vjeçarin. “Shërbimet e Komisariatit të Policisë Shkodër, në bashkëpunim me specialistët e Seksionit për Hetimin e Krimit Ekonomiko-financiar në DVP Shkodër, në vijim të punës për dokumentimin e aktivitetit kriminal në fushën e mashtrimit kompjuterik, në kuadër të operacionit ‘Avalon’, bënë kapjen dhe ndalimin
e shtetasit të shpallur në kërkim: J. M., 21 vjeç, banues në lagjen ‘Salo Halili’, Shkodër. Për këtë shtetas, Gjykata e Rrethit Gjyqësor Shkodër, me vendimin e datës 30.5.2022, ka caktuar masën e sigurisë ‘Arrest në burg’, për veprat penale ‘Mashtrimi kompjuterik’, ‘Ushtrimi i aktivitetit tregtar të paregjistruar në organet tatimore’ dhe ‘Vjedhja e energjisë elektrike’. Shtetasi J. M. ishte shpallur në kërkim, sepse në datën 27.5.2022, gjatë operacionit
policor të koduar ‘Avalon’, në një magazinë, në lagjen ‘Salo Halili’, janë gjetur dhe sekuestruar në cilësinë e provës materiale 16 pajisje elektronike, të cilat i posedonte ky shtetas dhe dyshohet se shërbenin për gjenerimin në mënyrë të jashtëligjshme të kriptomonedhave virtuale. Gjatë këtij operacioni është arrestuar në flagrancë shtetasi E. M., 43 vjeç, banues në Shkodër, pasi në bashkëpunim me shtetasin J. M., kryenin veprimtarinë e
kundërligjshme të prodhimit të kriptomonedhave virtuale. Gjithashtu, në kuadër të këtij operacioni u procedua në gjendje të lirë shtetasi F. B., 33 vjeç, banues në Shkodër, me detyrë lexues i aparatit matës, në OSHEE Shkodër, për veprën penale ‘Shpërdorimi i detyrës’, pasi dyshohet se ky shtetas ka mundësuar furnizimin e pajisjeve që gjenerojnë kriptomonedha virtuale, me lidhje të paligjshme të energjisë elektrike”, tha Policia.