Efektivi i Policisë dhunohet me leva e sende të forta
Zbardhen arsyet e konfliktit, 3 persona dyshohet se i ngritën pritë
Një efektiv policie është dhunuar një ditë më parë në Gjirokastër. Ngjarja ka ndodhur rreth orës 12:45 në vendin e quajtur “Ura e Lumit”, Gjirokastër. Efektivi Sokrat Muho, punonjës policie i DVKM-SË Gjirokastër, ushtron detyrën në pikën kufitare të Sopikut.
Ai është goditur në kokë dhe në trup, ndërsa ndodhej jashtë orarit të punës. Muho është dërguar në spital në gjendje të rënduar ku dhe ka marrë ndihmën e duhur mjekësore. Burime bëjnë me dije se Muho është konfliktuar verbalisht me tre persona, bashkëfshatarë të tij nga fshati Progonat i Tepelenës. Debati mes palëve kishte nisur një ditë më parë dhe ka vazhduar drejt përshkallëzimit deri në përballje fizike dhe dhunim të personit edhe ditën e djeshme, kur personat janë takuar në hyrje të qytetit të Gjirokastrës. Tre personat dhunues, që duket se e kishin parapërgatitur ngjarjen, e kanë goditur efektivin me levë
hekuri dhe bishtat e kazmave, duke i shkaktuar dëmtime të rënda në kokë. Ende nuk ka konfirmim zyrtar mbi arsyet e vërteta të ngjarjes dhe përplasjes mes palëve, por burime për “Panorama” pohojnë se efektivi ka pohuar si shkak një konflikt të vjetër pronash. Policia ka identifikuar dhe shpallur në kërkim njërin nga autorët e dyshuar, shtetasin G. Zh. Në vendngjarje shkuan shërbimet e Policisë të cilat ngritën pika kontrolli në hyrje dhe dalje të qytetit, me qëllim kapjen e shtetasit G. Zh., identifikimin dhe kapjen e autorëve të tjerë. “Rreth orës 12:45, në vendin e quajtur ‘Ura e Lumit’, Gjirokastër, persona
të paidentifikuar kanë goditur me sende të forta shtetasin S. M., punonjës policie i DVKM Gjirokastër, jashtë orarit të punës, i cili është transportuar në Spitalin Rajonal Gjirokastër, për të marrë ndihmën mjekësore. Është identifikuar dhe shpallur në kërkim njëri nga autorët e dyshuar, shtetasi G. Zh. Në vendngjarje kanë shkuar shërbimet e Policisë dhe janë ngritur pika kontrolli në hyrje dhe dalje të qytetit, me qëllim kapjen e shtetasit G. Zh., identifikimin dhe kapjen e autorëve të tjerë”, sqaroi Policia.