Zyrtari ukrainas: Të korrat e vitit të ardhshëm mund të tkurren me 40%
Zelenskyy thotë se miliona njerëz mund të vdesin nga uria për shkak të bllokadës ruse të porteve të Ukrainës
Të korrat e vitit të ardhshëm në Ukrainë mund të ulen deri në 40%, për shkak të pushtimit të vazhdueshëm rus, tha të enjten për CNN zëvendësministri i Politikës Agrare dhe Ushqimit të Ukrainës, Taras Vysotskyi. “Kemi humbur 25% të sipërfaqes së punueshme.
Për sa u përket vëllimeve, natyrisht, është më shumë. Ne parashikojmë që të korrat të jenë rreth 35% më pak se vitet e mëparshme, që do të thotë rreth 30 milionë tonë më pak, 35-40% më pak, pothuajse gjysma e të korrave të një viti më parë”, tha Vysotskyi. Zëvendësministri tha gjithashtu se rreth 600,000 tonë grurë janë vjedhur nga Rusia në territoret e kontrolluara nga forcat ruse. Të mërkurën, ministri i Jashtëm rus, Sergej Lavrov, tha se çështjet që lidhen me eksportet e grurit nga Ukraina mund të zgjidhen, por Ukraina duhet të çminojë ujërat për të mundësuar kalimin e sigurt të anijeve. Vysotskyi tha se komentet e Lavrov nuk janë të vërteta. “Është e pavërtetë. Problemi janë anijet ushtarake ruse, nuk është rasti i Ukrainës. Deri më tani, ata nuk ofrojnë siguri për anijet civile që lëvizin brenda dhe jashtë porteve të Ukrainës”, tha ai, duke vënë në dukje se derisa garancitë e sigurisë në emër të partnerëve ndërkombëtarë të merren nga Ukraina, “nuk mund të flasim për lejimin e këtyre anijeve jashtë”. Minat
mund të pastrohen shpejt, por që kjo të ndodhë, lufta duhet të përfundojë, ose duhet të ketë një formë të armëpushimit, shtoi ai. “Nëse marrim fitoren dhe lufta përfundon, sigurisht që mund ta pastrojmë shumë shpejt”, tha ai, duke shtuar se procesi fizikisht nuk është i komplikuar, por varet nga pengesat e tjera, përfshirë luftën në vazhdim. “Ukraina është e gatshme të përmbushë të gjitha detyrimet, në mënyrë që të furnizojë ushqimin e nevojshëm për sigurinë ushqimore ndërkombëtare. Pra, çështja është shumë e qartë: Rusia duhet të ndalojë luftën”, tha ai. Ukraina ka akuzuar gjithashtu rusët për vendosjen e
minave në Detin e Zi. Edhe Presidenti Volodymyr Zelenskyy paralajmëroi se miliona njerëz mund të vdisnin nga uria për shkak të bllokadës ruse të porteve të Ukrainës në Detit të Zi, të cilat ai tha se e kishin lënë botën “në prag të një krize të tmerrshme ushqimore”. Rusia ka kapur pjesë të mëdha të bregdetit të Ukrainës, duke bllokuar eksportet e fermave dhe duke rritur koston e grurit. Ukraina dhe Perëndimi akuzojnë Moskën se po përdor furnizimet ushqimore si mjet lufte. Rusia thotë se shkaku janë minat ukrainase të hedhura në det dhe sanksionet ndërkombëtare ndaj Moskës. Kyiv dikur eksportonte shumicën
e mallrave të tij përmes porteve detare, por që nga pushtimi i Rusisë më 24 shkurt është detyruar të transportojë grurë me tren nëpërmjet kufirit perëndimor të Ukrainës ose nëpërmjet porteve të vogla të lumit Danub. Udhëheqësit botëror kanë dënuar bllokadën mujore nga forcat ruse në portet kryesore në Ukrainë – duke përfshirë Mariupolin në Detin Azov dhe Odesën në Detin e Zi – që ka lënë më shumë se 20 milionë tonë drithë të bllokuar brenda vendit. Edhe bisedimet në Ankara një ditë më parë midis Rusisë dhe Turqisë për të lejuar rifillimin e eksporteve të grurit nga portet e Ukrainës kanë përfunduar pa zgjidhje.