“Open Balkan”, Scholz: Nxisim Procesin e Berlinit
“Kushdo që do të na bashkohet, duhet të ndjekë rregullat e BE” Turi dyditor në Ballkan, Kancelari gjerman: Duhet ta them qartë se ne prioritet të madh i japim tregut të përbashkët rajonal
Gjermania nxit Procesin e Berlinit teksa apelon se Bashkimi Evropian i jep prioritet të madh tregut të përbashkët rajonal.
Një qëndrim të tillë e bëri të qartë Kancelari i Gjermanisë, Olaf Scholz në një konferencë të përbashkët dje me Kryeministrin e Kosovës, Albin Kurti. Sipas Scholz, është me rëndësi arritja e përparimeve të vendeve që aspirojnë Be-në. “Sa i takon ‘Open Balkan’, duhet ta them qartë se ne prioritet të madh i japim tregut të përbashkët rajonal që duhet të përparojë dhe çështje që janë brenda tij mund të realizohen dhe çohen përpara. Mendoj që është e rëndësishme që të arrihen përparimet që janë të arritshme. Të gjithë duan të shkojnë në BE dhe atje janë rregullat e lëvizjes. Prandaj kushdo që do t’i bashkohet Be-së, duhet t’i ndjekë ato. Vullneti është shumë i madh për të bërë përparime. E para është rigjallërimi i Procesit të Berlinit. Procesi i Berlinit ka dhënë kontribut shumë të madh për bashkëjetesën në Ballkan dhe ne dëshirojmë ta nxisim. E dyta është çështja e anëtarësimit në BE për të cilën kemi folur. Ne e dimë së është një perspektivë realiste”, deklaroi Scholz. Kancelari i Gjermanisë, Olaf Scholz, përmendi se Kosova shkon drejt anëtarësimit në BE me zgjidhjen e dialogut me Serbinë. Ai bëri të qartë se dy vende që nuk e njohin njëratjetrën nuk mund të jenë pjesë e Be-së. “Marrëveshja duhet të zgjidhë edhe çështjen e Kosovës në fund, sepse është e paimagjinueshme që dy vende që nuk e njohin njëratjetrën të bëhen pjesë e Be-së. Të dyja palët duhet t’i qasen njëra-tjetrës”, deklaroi z. Scholz. Kancelari gjerman nënvizoi se për të arritur anëtarësimin në organizata ndërkombëtare duhet fillimisht të ketë një marrëveshje afatgjatë mes Prishtinës dhe Beogradit, rezultati i së cilës duhet të jetë njohja e Kosovës. “Në kohëra si këto vlerat e sigurisë dhe lirisë na bëhen më të qarta, është një arsye edhe më shumë e rëndësishme që Kosova dhe Serbia përmes një marrëveshjeje përfshirëse dhe
të qëndrueshme të gjejnë një zgjidhje politike, e cila kontribuon në stabilitetin rajonal. E qartë është që marrëveshja në fund duhet të zgjidhë edhe çështjen e njohjes së Kosovës, sepse është e paimagjinueshme që dy vende, të cilat nuk e njohin njëra-tjetrën të bëhen anëtare të Be-së”, deklaroi Kancelari gjerman. Edhe dy ditë më parë zëdhënësja e Komisionit Evropian, Ana Pisonero, deklaroi për median
ballkanike, “Europe Western Balkans”, se liderët e Ballkanit Perëndimor duhet të bëjnë përparim në zbatimin e tregut të përbashkët rajonal. Kjo është një nismë e krijuar në Samitin e Sofjes në vitin 2020 në kuadër të Procesit të Berlinit. Pisonero theksoi se mungesa e progresit në zbatimin e Tregut të Përbashkët Rajonal ka mbajtur përfitime të rëndësishme, veçanërisht për bizneset, investitorët dhe
konsumatorët. E pyetur në lidhje me qëndrimin e Komisionit Evropian ndaj nismës për “Ballkanin e Hapur” nën dritën e pranisë së Komisionerit Evropian Olivér Várhelyi në Samitin e Hapur Ballkanik në Ohird të mërkurën, Pisonero theksoi se Komisioni që mirëpriti pjesëmarrësit e “Open Ballkan” ishte i përkushtuar për të promovuar integrimin më të madh rajonal, por se mbetet e qartë
se “përfitimet më të mëdha do të vijnë nga gjashtë vende”. “Udhëheqësit e Ballkanit Perëndimor duhet të bëjnë përparim në zbatimin e tregut të përbashkët rajonal, të krijuar në Samitin e Sofjes në vitin 2020, me angazhimin konstruktiv të të gjitha palëve. Kjo është e rëndësishme për të realizuar përfitimet e plota të integrimit rajonal, për të shfrytëzuar sa më mirë investimet sipas planit ekonomik dhe të investimeve
dhe për të lidhur më mirë të gjithë rajonin me tregun e vetëm të Be-së. Në këtë kontekst, ndërsa prioritet mbetet avancimi në tregun e përbashkët rajonal, nisma e ‘Ballkanit të Hapur’ ka potencialin për të përshpejtuar integrimin ekonomik të rajonit, nëse kjo bëhet në mënyrë gjithëpërfshirëse dhe bazuar në rregullat dhe normat e Be-së dhe katër liritë të tregut të vetëm të Be-së”, deklaroi Pisonero.