Begaj u propozua nga PS, u votua me 78 vota

Bajram Begaj u zgjodh President i ri i Republikës së Shqipërisë me 78 vota në seancën e mbajtur më 4 qershor. Begaj u zgjodh në këtë detyrë me votat e Partisë Socialiste dhe Partisë Social Demokrate, ndërkohë, sipas llogaritjeve, ka rrjedhur edhe një votë nga opozita. Nga 83 deputetë që morën pjesë në votim, 78 kanë votuar pro, katër kundër dhe një abstenim. Maxhoranca në total ka 74 mandate, ndërsa 3 i ka Partia Socialdemokrate dhe një deputet nga opozita ka votuar për Presidentin e ri. Bajram Begaj e mësoi live nga TV kandidaturën e tij për President, pasi Kryeministri Edi Rama e përmendi pas mbledhjes së kryesisë së PS, të cilën e pranoi pa asnjë hezitim. Bajram Begaj ka përfunduar “Doktoratën në Fushën e Mjekësisë”, pranë Fakultetit të Mjekësisë si dhe mban titullin “Profesor i Asociuar” në Mjekësi. Begaj flet rrjedhshëm gjuhën angleze.

Ai është i martuar dhe ka dy fëmijë.