Punësimi i mësuesve, nis gara për lëvizjet paralele

Deri në 30 qershor, afati për të dorëzuar dosjen për të lëvizur nga një shkollë në tjetrën. Çfarë i skualifikon ata nga gara

Krahas mësuesve që konkurrojnë çdo vit për të zënë një vend pune, ka edhe të tjerë që e kanë një të tillë, por nuk e pëlqejnë.

Njëjtë me të parët, edhe ata garojnë, por kërkesa e tyre shikohet me prioritet. Vendet vakante të krijuara pas lejeve të lindjes, daljeve në pension apo çdo lloj largimi tjetër, iu ofrohen së pari mësuesve që janë në sistem. Si çdo vit, edhe për vitin shkollor 20222023, drejtoritë rajonale të arsimit hapin thirrjet për dorëzimin e dosjeve për mësuesit që duan të bëjnë lëvizje paralele, nga një shkollë në tjetrën. Ata kanë afat që deri në 30 qershor të bëjnë gati dosjen për ta dorëzuar në rrugë postare në zyrën arsimore ku aplikojnë, me qëllim që t’i nënshtrohet shqyrtimit nga komisioni i ngritur posaçërisht.

AFATI

“Mësuesit që dëshirojnë të kryejnë lëvizje paralele me dëshirë, dërgojnë me shërbim postar deri në datën 30.06.2022 në adresën postare kërkesën dhe dokumentacionin e njësuar me origjinalin, të noterizuar. Jashtë këtij afati nuk pranohen aplikime”, citohet në njoftimin e zyrës më të madhe arsimore në vend, asaj të Tiranës, në të cilin kujtohen mësuesit që në rast se dosja e tyre nuk përmban dokumentet e detyrueshme apo paraqitja e tyre nuk është e noterizuar, skualifikohet. “Në rast se dokumentacioni i detyrueshëm për t’u dorëzuar/kualifikuar (diplomë, lisë notash, licencë, librezë pune e plotësuar, vlerësim i këshillit të prindërve, vlerësim i shërbimit psikosocial, vlerësim i drejtorit) nuk dorëzohet fare apo nuk dorëzohet i noterizuar, aplikimi i mësuesit skualifikohet nga komisioni. Në rast se dokumentacioni tjetër (dëshmi kualifikimi, dëshmi e mbrojtje së gjuhëve të huaja, certifikatë me kredite) nuk dorëzohet fare apo dorëzohet i panoterizura, mësuesi kualifikohet, por ky dokumentacion nuk pikëzohet nga komisioni”, nënvizohet në njoftimin e drejtorive arsimore.

Paralelisht me garën e mësuesve të rinj që duan të futen në sistem, Ministria e Arsimit “rehabiliton”

së pari ata që janë të punësuar, duke i transferuar në një shkollë më afër vendbanimit apo më të mirë. Janë mësuesit ata që bëjnë kërkesën, ndërsa shqyrtimi i tyre bëhet nga një komisioni i posaçëm gjatë periudhës që ata marrin pushimet, në korrik-gusht. Përgjatë viteve të fundit, udhëzimi për rekrutimin e mësuesve ka

pësuar disa herë ndryshime, duke favorizuar së fundmi ata me përvojë më të gjatë në arsim. Ka një skemë vlerësimi që cakton pikë për çdo tregues të dosjes profesionale, nga testi i licencës, gjuhët e huaja, trajnimet e deri te vlerësimi i përfaqësuesve të prindërve, psikologut e drejtorit të shkollës që është kryetar komisioni.