Festa e PS, Rama uron patronazhistët dhe Nanon
Gjiknuri: “PS, forca më demokratike e transformuese”. Majko uron ditëlindjen me një foto të ish-kryetarit me Agollin
Në 31-vjetorin e Pssë, Kryeministri Edi Rama nuk mbajti fjalim përshëndetës, por mëngjesin e djeshëm shpërndau një mesazh urimi për të gjithë ata që i kanë dhënë dhe vijojnë t’i japin Partisë Socialiste.
Rama përmendi patronazhistët që patën rol të rëndësishëm në zgjedhjet e 25 prillit, për të vijuar më pas me drejtuesit në territor, themeluesit dhe liderin Fatos Nano. “Mirëmëngjesi dhe me urimin për ditëlindjen e Partisë Socialiste, të gjithë atyre që i kanë dhënë dje dhe i japin sot Ps-së, që nga patronazhisti më i thjeshtë, te drejtuesit në territor e deri te themeluesit e saj dhe lideri Fatos Nano, ju uroj të gjithëve ju një të diel të qetë 31 vjet PS”, shprehet Rama. Sekretari i Përgjithshëm i Ps-së, Damian Gjiknuri, uroi të gjithë socialistët për 31-vjetorin e PS. Në urimin e tij në rrjete sociale, Gjiknuri shprehet se PS mbetet forca më demokratike e transformuese në Shqipëri. “31 vjet PS. Me urimin e përzemërt për çdo anëtar, mbështetës, drejtues e këdo që ka dhënë e vazhdon të japë një kontribut sado të vogël për Partisë Socialiste, duke dëshmuar se familja jonë politike mbetet forca më demokratike e transformuese në Shqipëri, dhe me premtimin se do të vazhdojmë përpjekjen që PS të bëhet më e mirë, më e fortë për të gjithë, ju uroj një ditë të mbarë”, nënvizon Gjiknuri. Kryetari i Grupit Parlamentar, Taulant Balla, ndau në rrjetet sociale një mesazh urimi në 31-vjetorin e krijimit të PS. Balla shprehu mirënjohjen e tij ndaj themeluesve kurajozë dhe të gjithë kontributorëve ndër vite, të cilët i dhanë Shqipërisë forcën politike më të madhe, më atdhetare, gjithmonë e hapur, gjithmonë progresiste e moderne, e cila promovon në Shqipëri vlerat më të mira socialdemokrate europiane. “Gëzuar ditëlindjen e 31-të të Partisë Socialiste. Mirënjohje themeluesve kurajozë, të gjithë kontributorëve ndër vite, të cilët i dhanë Shqipërisë forcën politike më të madhe, më atdhetare, gjithmonë e hapur, gjithmonë progresiste e moderne, e cila promovon në Shqipëri vlerat më të mira socialdemokrate europiane. Mirënjohje anëtarëve, patronazhistëve, simpatizantëve dhe çdo votuesi në këtë ditëlindje të familjes sonë të madhe. GËZUAR!”, shkruan Balla. Nga ana e tij, kryetari i Bashkisë së Tiranës, Erion Veliaj, uroi të gjithë socialistët për 31-vjetorin e themelimit të PS. Përmes një postimi në rrjete sociale, Veliaj thekson se PS është forca që po transformon Shqipërinë dhe Tiranën. “Gëzuar Ditëlindjen Partia Socialiste, forca që po transformon Shqipërinë dhe Tiranën. Mirënjohje çdo socialisti të thjeshtë, që i jep energji dhe përkushtim, që punët të ecin përpara. 31 vjen”, shkruan Veliaj. Edhe deputeti Pandeli Majko uroi dje 31vjetorin e krijimit të Ps-së. Me anë të një postimi në rrjetin social “Facebook”, Majko shkruan se ka çaste, kur rastësia kthehet në diçka të përsosur. “Shumica e jetës së njeriut, është veprimtari plotësuese. Ka çaste, kur rastësia kthehet në diçka të përsosur, siç ishte 12 qershori i 31 viteve më parë. Gëzuar ditëlindjen familja ime, Partia Socialiste!”, shkruan Majko. Kurse ministrja e Arsimit dhe Sportit, Evis Kushi, shprehu urimin në përvjetorin e Ps-së, duke zgjedhur një personazh të spikatur, Musa Ulqinin, të cilin e konsideron një njeri të denjë, themelues dhe kontribuues brenda kësaj partie.