Albana Vokshi zgjidhet zëvendëspresidente e Forumit të Grave në PPE
Deputetja e Pd-së, Albana Vokshi, zgjidhet zëvendëspresidente e Forumit të Gruas së Partisë Popullore Europiane. Komisioni i Rithemelimit njofton se gjatë Kongresit të EPP Women të zhvilluar në Dublin, Vokshi rezultoi një nga 3 gratë më të votuara, duke përfaqësuar Lidhjen Demokratike të Gruas dhe Partinë Demokratike. “Jam shumë mirënjohëse për mbështetjen e familjes sonë të madhe europiane. E gjithë energjia ime do të jetë për të promovuar vlerat e demokracisë europiane, për të fuqizuar gratë në Shqipëri, Ballkanin Perëndimor dhe kudo ku luftojnë për barazi. Rajoni ynë dëshiron të jetë pjesë e Europës dhe gratë në politikë në Ballkanin Perëndimor janë në qendër të përpjekjeve për integrim. Zgjedhja në Presidencën e EPP Women është një sinjal që integrimi europian është real e që i përkasim një familjeje europiane”, shkruan në mesazhin e saj falënderues Albana Vokshi. Zgjedhja e deputetes së PD si zëvendëspresidente në Forumin e Grave në PPE është përshëndetur edhe nga ish-kryeministri Sali Berisha dhe ish-presidentja e Forumit të Gruas së Partisë Popullore Europiane, Doris Pack. Presidente e EPP Women u zgjodh deputetja rumune Rozalia Biro, kryetare e Komisionit për Punët e Jashtme. Në 6 vendet për zëvendëspresidente u zgjodhën: Agnieszka Pomaska, Mariya Gabriel, Albana Vokshi (deputete e Pd-së), Dubravka Suica, Walburga v. Lerchenfeld dhe Doina Gherman.