Vendimi i Gjykatës së Janinës për Jorgo Toton
Me 17 shtator të vitit 2019, Partia Demokratike ka publikuar një dokument të Gjykatës së Janinës, sipas të cilit, Agim Kajmaku, asokohe kryetar i Bashkisë së Vorës, ka qenë në kërkim nga drejtësia greke me emrin Jorgo Toto dhe është shpallur i pafajshëm. Sipas dokumentit, mësohet se Kajmaku është arrestuar në Greqi në vitin 2003, por pafajësinë e ka marrë se kreu i Bashkisë Vorë nuk mund të kryente transaksione me eurot e falsifikuara. PD këmbënguli që ishin vërtetuar akuzat dhe se Kajmaku duhej të arrestohej.
REAGIMI I PD-SË
“Gjykata e Janinës konfirmoi të gjitha denoncimet e Partisë Demokratike se Agim Kajmaku ishte në kërkim nga drejtësia greke, pasi është arrestuar në janar të 2003-shit me emrin Jorgo Toto dhe ai e kishte fshehur këtë fakt në formularin e dekriminalizimit. Seancat gjyqësore për Jorgo Toton e Bashkisë së Vorës, të zhvilluara në Janinë për 4 ditë, u japin fund zvarritjeve të prokurorisë për zbulimin e identitetit të kandidatit të Edi Ramës. Megjithëse i dha kohë të sigurojë që nuk futet në burg në Greqi duke mbyllur çështjen atje, Agim Kajmaku ka punë me ligjin shqiptar. Vendimi konfirmon se Agim Kajmaku, alias Jorgo Toto, ka qenë me proces penal të hapur në Greqi dhe me urdhër arresti në fuqi, ashtu sikurse Partia Demokratike denoncoi”.