VIZITA NË SHQIPËRI

Kreu i shtetit, pak ditë më parë, priti kryetarin e Federatës Panshqiptare “Vatra” në një takim në Tiranë, në të cilin merrte pjesë edhe Christopher Hyland, një nga bashkëpunëtorët e afërt të Presidentit Klinton. Meta e cilësoi Hyland si “mikun e madh të kombit shqiptar”. “Kënaqësi të takoja sot kryetarin e Federatës Panshqiptare ‘Vatra’, z. Elmi Berisha dhe mikun e madh të kombit shqiptar, Christopher Hyland, një nga bashkëpunëtorët e afërt të Presidentit Klinton. Mirënjohjen më të thellë vatranëve, diasporës dhe miqve të sinqertë të shqiptarëve në SHBA, për mbështetjen e Shqipërisë dhe çështjes shqiptare, zhvillimin e demokracisë në vendin tonë, për kontributin shumë të vyer të dhënë për lirinë dhe pavarësinë e Kosovës, si dhe për angazhimin e palodhur në forcimin e marrëdhënieve shqiptaro-amerikane”, shkruante Meta në mesazhin e tij pas takimit në Presidencë më 27 maj.